國企上星期尾發力，資金落場，炒到火紅火綠，要追落後，四川成渝（107）有得諗。
今年上半年中央實施宏觀調控，不過，同其他公路股一樣，成渝繼續車水馬龍。04年中期（6月止）純利重有雙位數增長，達到16%，去到1.15億元人民幣。再中線睇，西部大開發係中央order，冇得叫停，成渝一定係受惠者。
又呢期國企股反彈，公路股重未見顯著彈出，四川成渝已經有落後概念，更何況，睇番所有公路股，淨係得四川成渝重有資產折讓。今年6月底，每股資產值1.75元，現價折讓47%，其他公路股包括深高速（548）、滬杭甬（576）、安徽皖通（995），全部相對每股資產值，講緊有溢價，四川成渝講緊係雙重落後概念，若然呢期國企股升幅，並非流料，成渝中長線追到同每股資產值睇齊，講緊88%升幅，肯定夠吸引。短線睇，隻股突破到橫行頂0.95元，首個目標上望今年6月頭高位1.08元。
力寶華潤（156）星期五公布04年中期。又講兩點，第一，呢期所見，部份同類股份包括新鴻基公司（086）及大福證券（665）04年中期表現唔錯，斷估力寶華潤證券業唔差得去邊，加埋集團有經營澳門銀行業，呢期澳門好環境，大家都知。第二，每股資產值0.47元，現價相對折讓67%，論資產折讓，具吸引力。集團股價於6月至今，於0.15元打底已久，但苦無利好消息策動攻勢，留意星期五業績期前後，有異動，唔怕短線走一轉。
錢雋