施念慈父母早年離異，她自幼和母親相依為命，故離婚事件亦曾叫母親很擔心。Celia說：「媽咪當然想我婚姻好，但係呢啲嘢控制唔到，我解釋畀佢聽之後佢亦好明白，𠵱家我都好擔心媽咪，驚佢年紀大，一個人覺得悶，好在佢多朋友，我𠵱家又多咗時間陪佢。」
雖然離婚，但施念慈仍視老爺奶奶如家人，她說：「呢兩年同老爺奶奶一齊住，到𠵱家佢哋都對我好好，所以感覺重好似一家人咁，佢兩個係上天送畀我好大份嘅禮物，我爹哋一直唔喺我身邊，老爺就好似我爹哋咁錫我，我希望有能力可以孝敬佢哋。」
有指施念慈離婚後經濟出現問題，對此她笑着否認，更表示今後會自食其力。施念慈說：「我暫時生活冇問題，未至於話手停口停，但當然唔可以坐喺度唔做嘢啦，亦唔可以掛住shopping同享受生活，壓力當然有，如果娛樂圈有適合我嘅工作，我亦會做，呢排我要幫有線劇集《靈異偵緝檔案II》做宣傳，拍攝時我同台前幕後都相處得好好，凡事有商有量，希望以後大家有機會再合作。」
撰文：張止寒 攝影：林德雄
服裝提供：ZTAMPZ 化妝：CandyHui 場地提供：Teca
