上星期日《名采》改版，換上新裝，左丁山奉編輯之命，以後星期日休息，甚為高興；點知好多老友唔知，上星期日一睇《蘋果》，冇晒平時見慣啲專欄，好唔慣，猛咁打電話嚟問左丁山是否被《蘋果》飛走咗，以後冇得寫。左丁山解釋到口都乾埋。好嘞，星期二又收到編輯指示，話以後星期日恢復原狀，照樣交稿喎，既然如此，各位關心左丁山嘅大佬大姐，請注意星期日《名采》副刊，各位名家以及寫得最差嗰個左丁山，仍然與廣大讀者見面。
選舉過後，回復正常，大少爺做番大少爺，小小姐做番小小姐，本來面目盡露。大記者慨嘆有人在星期一凌晨三點之時黑口黑面，正午見記者就笑容燦爛；有人三點時面露微笑，正午見記者時就苦過梁天來；有人投票時間對記者客客氣氣，當選後慶功就搵保安趕記者。雖然話政治選舉係一場大騷，大家都識得在鏡頭前做戲，但變臉變得咁快，相信克林頓亦自嘆弗如。
紫微高人Y喺幾個禮拜前到陸羽飲茶，與大狀W密斟，碰啱左丁山亦上到陸羽，於是叫左丁山行埋去傾咗一陣。高人Y當時話：「有時間，碰啱機緣，請你叫我哋嘅共同老友小心，佢一定會當選，當選後一定會俾人整蠱，成日見報，要有充份心理準備呀。」唉，呢啲嘢冇得好講，日防夜防，暗箭難防，做得政治人物，就要預備俾人暗算，叫他怎能逃避！
高人Y之後就雲遊四海，由東北長春去到南太平洋大溪地，祖宗文化遺產，真係可以扶助後人，如高人Y者，不貪不謀，自奉甚儉，一啲朋友話佢懶，但佢能夠樂在其中，亦係一種福氣。