臨近十一國慶，加上熱錢流入，國企股炒高慶賀一番，成交金額猶勝藍籌，就連滙控（005）都要行埋一邊，認真唔到你唔服。
這邊廂國企股㷫烚烚，但那邊廂工業股繼續斯人獨憔悴，繼前日毛公仔生產商德林國際（1126）公布業績倒退，股價即刻勁跌之後，噚日東強電子（615）公布業績亦倒退，輪到被芬佬狂質，股價勁跌30.7%，收0.63元。如果情況持續，睇嚟好多工業股繼續冇運行。
平日成交唔大嘅東強，噚日成交股數急增至4336.8萬股，金額2902.9萬元。經紀黃話，睇勢芬佬真係沽得好急。
東強剛公布截至今年6月底止中期業績，盈利只有1369.8萬元，比去年同期下挫64.3%，雖然仍有中期息0.5仙，但已傷盡唔少投資者的弱小心靈。
經紀黃話，舊年起油價同原材料價格猛咁升，加上大陸缺電又唔夠工人，一早估到做廠艱難，但有樣嘢諗極都唔明，點解芬佬鋪鋪都係後知後覺，唔到人哋出業績都發現唔到真相。
慕容小初