張震最近接演由內地名導演田壯壯開拍嘅新片《吳清源》，演繹喺中國出生、名揚東瀛嘅圍棋大師吳清源嘅傳奇一生。噚日呢部戲喺北京開鏡，張震為配合角色，特登戴番副溥儀式嘅眼鏡，重會喺片中分別着唐裝同日本傳統服示人。而佢第一日開機拍片，就因暈船浪而搞到嘔吐大作。
今次田壯壯花咗四年時間拍《吳》片，佢千挑萬選終於揀咗張震扮演青年同中年嘅吳清源，張艾嘉就扮吳清源阿媽，日本演員松坂慶子同香川照之亦有份參演，但最難得嘅係現年九十一歲高齡嘅吳清源本人，話如果身體狀況許可嘅話，會親自喺片中出鏡。而主理《十面埋伏》戲服嘅日本服裝造型師和田惠美女士，呢次都會為《吳》片設計戲服。
馮仁昭就覺得張震嘅可塑性甚高。佢喺《春光乍洩》扮同志、《臥虎藏龍》入面扮型仔山賊羅小虎、《天下無雙》扮搞笑皇帝仔都十分出色，呢次孭飛做吳清源，唔知又可唔可以令佢嘅事業更上一層樓呢？
台灣名模林志玲同唐安麒嘅合約完咗後，雙方為續約鬧得不快，卒之有傳唐安麒會搵一位身材一樣咁弗嘅女模林嘉綺頂替林志玲任新代言人，林嘉綺重會出書同影全裸相做宣傳，佢話：「其實廣告本來就係需要換季，唔可以話誰取替誰，如果唐安麒老師用我應該會很有成就感，因為我本身babyfat，如果拍起嚟效果會很明顯。」
林嘉綺和林志玲原來以前屬同一間日本經理人公司，林嘉綺話：「幾年前我哋一齊喺日本生活，我覺得志玲是非常乖的女生，可以說表裏如一。」
無綫總經理陳志雲噚日同新任資訊文教科經理蕭惠雄喺將軍澳電視廣播城會見傳媒，公布兩項變更。無綫會喺十一月起逢星期一至五早上及下午時段增設兩個名為《香港直播》嘅節目，會喺戶外直播室討論有關金融、財經及娛樂新聞嘅消息，但無綫就堅持要賣關子，拒絕透露主持人係邊個喎。
王賢誌細妹王賢德呢個月二十五號同拍拖多年嘅男友KenChan，喺跑馬地一間教堂行婚禮，跟住二十九號就會喺灣仔君悅酒店擺酒。馮仁昭聽聞呢位阿Ken除咗係名人成日光顧嗰間Cova餐廳嘅股東之一外，佢同王賢誌一樣都係大家族嘅後人，而且重係何超儀嘅前男友，來頭都唔小。
