大市反覆，國企股則大領風騷，國指升幅幾乎有2%，焦點所在係隻中鋁（2600），收4.425元，升6.6%。國指升幅81點，有10點歸功於佢。
中鋁C輪：窩輪10大龍虎磅，中鋁C輪着咗5件。啲交叉輪數據難計，唔係一般散戶對象。標準C輪則風險好高，咪亂買。是日輪王9359，由4.8仙飛上11仙，升幅129%，唔算乾升，有5球幾易手，有人掟70萬銀落去賭，隻輪最後交易日本月27日，即係仍有6日玩，溢價8.7%，槓桿率40.2倍（有效13倍），引伸波幅高到55%。行使價4.7元，未來6日正股上到4.70元（現價4.425元），隻輪先至有剩餘價值，唔係話有錢賺。正股要上到4.82元以上，揸隻輪先至唔使輸。要博，博正股好過。
中石油C輪：龍虎榜上有隻中石油C輪9839，由15.5仙彈上20.9仙，升幅35%，十幾球易手，炒家掟262萬銀落去賭。隻輪已屆末日，下周五最後交易，剩番5日炒。負溢價0.4%，槓桿率19.3倍。即已平水，正股上落三幾個位，隻輪肯定飛沙走石。中石油C輪要穩穩陣陣，可以揀9343，爆炸力同殺傷力細啲，個個價位都有成交。
大唐C輪：大唐發電（991）冇事，收6.60元，有5仙進帳，但隻C輪9953則有事，收2.5仙，大散43%。隻輪未到末日，但都快嘞，11月中夠鐘，溢價25.8%，槓桿率264倍。唔使睇數據，睇行使價8.28元，大概都諗到隻輪屬於冇乜用嗰隻。希望正股由𠵱家6.60元喺個幾月內升到8.28元以上，不切實際。
章盛