一年一度美國電視界盛事艾美獎，將會喺香港時間下星期一舉行，《老友記》靚女珍妮花雅麗絲頓（JenniferAniston）同《色慾都市》嘅莎拉謝茜嘉柏嘉（SarahJessicaParker）為爭奪艾美獎最佳喜劇女主角，足足鬥咗三年，不過外界卻認為今次莎拉呼聲較高，更成為博彩公司GoldDerby嘅頂頭大熱。
珍妮花演完最後一季《老友記》後，相信佢好想繼兩年前後，攞埋第二個艾美獎作為最美好嘅紀念，不過莎拉亦同樣以最後一季《色》劇獲提名最佳喜劇女主角。據GoldDerby嘅最新賠率顯示，現時莎拉以一賠一成為大熱門，而珍妮花只係以一賠六成為第三熱門。評論員認為五度失意艾美獎嘅莎拉，喺最後一季《色》劇嘅演出最為討好，絕對有機會脫穎而出。
至於最佳劇集大獎方面，雖然《白宮群英》已經連續四年捧走呢個獎，但今年《人在江湖》來勢洶洶，有望打破《白》劇連續五年冧莊嘅美夢。現時《人》劇嘅賠率係五賠七成為頂頭大熱，而《白》劇就係五賠九，成第三熱門。
此外，珍妮花最近同莎拉真係鬥到難分難解，兩人剛喺荷李活最佳秀髮女星選舉中躋身十大，排第三嘅珍妮花比排第六嘅莎拉成績更佳，不過，佢哋兩個一定比較關心艾美獎多過呢個無謂選舉嘞。