以年輕人為對象嘅觀塘創紀之城五期商場apm，啱啱引入九家化妝美容品牌承租，面積四百至二千五呎，夾埋萬幾呎，每呎一百二十五至二百五，係商場最高呎租，比一般租戶高出一倍。
呢九個新租戶，係植村秀、倩碧、Biotherm、GLYCEL、H2O＋、L'OrealParis、Maybelline、TheBodyShop，以及ILColpo，大家重會合作推出cross-over產品。新地副租務總經理馮秀炎話，好似Maybelline咁，首度引入自動售賣機，啲客入錢就買到想要嘅化妝品，夠晒創新。
噚日發展商重安排著名化妝師，即場為嘉賓示範化妝，藝人陳冠希家姊陳見飛係嘉賓之一，配合番個場嘅活力形象。
個場合共有成六十三萬呎，租出近九成，明年三月全線開業。
馮秀炎又透露，有意將創紀之城第十二及十三樓寫字樓，出租予如spa等服務為主嘅行業。
九倉今年重頭新盤深井碧堤半島二期，今晚開鑼內購。
賣樓主帥黃光耀，近排頻頻撲撲，忙於宣傳，早排打完網球又打保齡球，認真辛苦。
中記噚日趁住碧堤分行開張，送咗大桶補腰力嘅藥材酒畀黃生，等佢今晚腰力十足，撐足一晚做內購。黃生即場試飲，結果未開紅盤，塊面先「滿堂紅」。
中區甲級商廈，租金近年不斷回升，全層海景寫字樓，買少見少，美記正重點推介一個城中筍盤，灣仔新銀集團中心二十九樓全層，業主送埋數百萬元豪裝、設施同電話系統。單位七千四呎，業主叫租每呎十七蚊，每月唔使十三萬，重有價講。
代理話，層寫字樓係九七年前裝修，當時裝修費比較貴。蘭西記得，幢樓喺金融風暴前，由明珠興業發展，本來計劃作總部，現時招租單位，話唔定曾經計劃作明珠興業（現稱新銀集團）前主席黃坤辦公室，所以落重本，裝修費隨時貴過兩年租金。
跑馬地藍塘道，年逾半百嘅豪宅，啱啱以高價易手，原業主係八十年代著名女星顧美華，近期憑電影《美麗上海》成為金爵獎影后。
顧美華九九年以六百五萬，買入藍塘道四十三號苑蘆高層B，二千二呎，日前以近千一萬賣出，每呎五千，勁賺四百五萬。買家係英籍投資者，睇中單位裝修全新，兼附全屋家電，打算買嚟收租，預計月收五萬，回報逾五厘。
區內代理話，樓齡五十四年嘅舊樓，五年間可以升值近七成，呎價創五千新高，都算得係罕見。
蘭西
電郵地址：