譚詠麟早前到新疆遊覽天山，坐車上天山的山路十分崎嶇，險象環生。阿倫又獲村民款待，目擊劏羊過程，觸目驚心。雖然天山風景優美，但滿地羊糞和馬糞，堪稱另一奇景。
譚詠麟經常到內地巡迴演唱，自誇走遍大江南北，早前他要到新疆工作，阿倫說：「中國嘅東南西北都去勻，就係未去過新疆，今次重會上天山，就係武俠小說《七劍下天山》嗰個天山。」
阿倫被當地的文化吸引，尤其是天山之行，他說：「由市中心到天山要坐三個鐘頭車，馬路重經常有幾百隻羊同我哋爭路，真係好得意，喺大馬路見到天山，心情已經好興奮。」
只有一條路上天山，沿途經過不少懸崖峭壁，當地因為要開發為旅遊區，有很多巨型泥頭車往來狹窄的山路，險象環生，阿倫說：「行山路真係要好小心，條路成日有對頭車，又唔平，坐車個感覺就好似坐過山車咁，幾刺激。落山嗰陣見到幾架公安車，原來有架車轉彎滑咗落山崖，粉身碎骨，真係幾得人驚。」
到達天山山腳，氣溫只得零下幾度，阿倫跟一班工作人員把車停在幾個蒙古包附近，一向喜歡探索新事物的阿倫，隨即探頭到其中一個蒙古包內，他說：「嘩！入面同出面啲溫度差好遠，原來呢度班村民係會招待遊客，重會即刻喺你面前殺隻羊煮畀你食，剝咗層皮個心重跳緊，真係唔敢睇。」
阿倫表示天山雪景美麗，不禁要拍照留念，他說：「但係重有一個奇景，就係蒙古包外面四圍都係帶有濃烈羶味嘅羊屎同馬糞，除非唔落車，如果唔係就肯定成腳屎，咁我就梗係唔例外啦！」
採訪、攝影：楊潔雯
