功能組別選舉，選出幾個「長毛」，譬如證券界長毛詹培忠、醫學界郭家麒、社會福利界張超雄，都係行內比較激進之輩，而且全部牙尖嘴利。功能組別選舉有人投訴（會計、社福、醫學），話收回嘅選票多過發出選票，以左丁山所聽所聞，呢樣可能係投票站人員擺烏龍所致。
保險L係會計師，有會計界投票資格，佢去到票站攞選票，職員畀咗一張直選選票之外，發現佢係會計界功能組別選民，就請佢等一陣，一等就係五分鐘，原來負責派票嗰位小姐行開咗。保險L後面排緊嘅選民開始不耐煩，職員於是伸手去攞張功能組別選票畀保險L，保險L做慣會計，特別小心，睇真啲，咦，係其他組別選票喎！職員連忙再遞過一張畀佢，呢次就啱嘞。保險L話：「以我親身體驗，佢哋派錯咗派多咗，一啲都唔奇，總之今年選舉有好多烏龍，胡官唔應該逃避。」
小烏龍或者無損大局，大烏龍就有違誠信。金融服務界有三位候選人，事先都話自己有二百票，馮家彬、張華峯都在證券界打滾多年，唔會講大話啩？結果分別只得六十一票、九十二票，真係輸得好難睇，相信馮張兩位都係收咗好多空頭選票，有苦自己知，弊在不記名投票，冇法知道邊位選民係駱駝牌暖水壺︱︱一味靠滾。
牙擦詹就抵佢牙擦，知心友共二百七十五個（其他四位候選人加埋只得二百五十七票），事前話得出，真係做得到，冇滾到牙擦詹。照計一就一，二就二，牙齒當金使，點解馮張二人會踩中西瓜皮呀？左丁山好反對有功能組別小圈子選舉，認為全部立法會議席都應該直選，既然已有比例代表制保護民建聯，直選未必益到民主派，董生使乜驚呀!?