經紀陳早排提過中華城市燃氣（603）賣殼一事終告落實，入主冇耐的大陸投資者，賣殼畀以前一位董事，雖然並無全面收購，但計落交易作價6629萬元買22.9%，即係每股3仙，較市價出現好高溢價，難怪中華城市燃氣噚日復牌，股價大升13.33%，收1.7仙。
由於隻股成交有28億股，金額439萬銀咁多，小初以為有料到，想撲入玩一轉，但經紀陳覺得隻股就算真係炒，都只係炒上落，扶搖直上機會唔大，因成個交易據聞係「合浦珠還」，新主暫時應該未有大動作。
中華城市燃氣以往曾經熱炒過，甚受炒家歡迎，所以貨源分布甚散，除非人哋好有計劃，否則好難炒得起。
另一方面，由於係仙股，所以深受炒家歡迎，因為郁一個價位已經可以收回成本，所以出出入入的炒家甚多。
另外，剛剛供完股唔夠數，有人要上身認購唔足額供股新股的大慶石化（362），噚日爆炸力甚強，升11.29%，收0.345元。經紀陳話，大慶2供1，每股0.30元，以現價計，參與供股者帳面已經賺多過10巴仙。
慕容小初