女子組合2R𠵱家喺珠海拍緊電影《妃子笑》，Race喺呢個月嘅七號生日，雖然嗰日佢要喺工作中度過二十二歲牛一，但係有十個fans專程喺香港拉隊到場送上生日蛋糕，重送埋零食同啤啤熊做禮，令Race好感動，反而佢家姐Rosanne送畀Race嘅禮物，竟然係「超級無敵兜巴星」。
馮仁昭噚日同Race通電話，佢話呢個生日令佢好難忘，特別係Rosanne送畀佢嘅「禮物」，Race話：「家姐送咗一巴掌畀我呀，因為嗰日要拍一場家姐摑我嘅戲，初頭家姐係借位，之後就輕手拍我，但導演都唔收貨，所以佢最後要大力一巴摑落嚟，我有喊呀，但唔係因為俾家姐打喊，係劇情需要。」
Race話Rosanne不嬲錫到佢燶，從來都冇打佢，而早排喺泰國拍《死亡寫真》時，又因為劇情需要，所以Rosanne要打Race，估唔到打開有條路，今次重要喺生日俾家姐兜巴星，真係傷在妹身，痛在姐心喇！
EO2噚日到商台接受訪問，成員Otto同Eric早前一齊去日本旅行，佢哋除咗大出血外，更有唔少豔遇，佢哋話：「我哋拎住部DV周圍影，點知就有兩個朱古力色嘅女仔行埋嚟同我哋講嘢，但係我哋聽唔明，於是就用英文問番佢哋，點知佢哋即刻掉頭走咗。」而佢哋又話喺酒店內有睇過打格仔嘅AV試片，但因為要畀錢先至冇再睇落去。
名模Rosemary同陳嘉容一連兩日喺中環行時裝騷。談到琦琦有孕，身為佢好友嘅Rosemary噚日話：「恭喜佢，係一個新開始，我𠵱家連男朋友都冇，所以唔心急結婚同生仔。」而陳嘉容就話：「我諗要送一個腰封畀佢，重會打電話恭喜佢，琦琦同老公一樣咁高，佢哋個BB將來一定又高又靚。」
蔡慧敏回復自由身後，即簽約台灣經理人林子玄，亦即傅天穎（奀妹）嘅二嫂，佢喺兩個月前已經過咗台灣發展演藝事業，重喺嗰邊租咗屋，諗住長期發展。蔡慧敏舊年已積極學國語，尤其長期留喺台灣，生活上需要日日講，所以佢𠵱家啲國語已經講得好流利。
環球新人陳苑淇前晚去咗銅鑼灣崇光睇時裝騷，佢一早到場，以一條低胸花裙亮相，對比着住長袖衫嘅董敏莉、同披住長頸巾嘅鄭融嚟講，自然搶鏡好多。不過可能陳苑淇重係新人，始終吸引唔到記者做訪問，佢惟有坐定定睇騷，逐個模特兒由頭睇到腳，不知幾投入。
