個市稍作整固，又再嚟過，恒指再漲125點，收13209，剛剛破咗上周三個頂（13190）。
滙控C輪：33隻恒指成份股中，有4件微跌或者冇升，滙控（005）係冇升其中1件，即係點？即係有機會追番上去。咁就要搵啲滙控C輪炒吓。滙控C輪多到眼花，較短期嘅爆炸力較強（殺傷力亦係），較遠期嘅爆炸力較弱。唔想太搏殺，又唔想太欠進取，行中庸路線，可向9772埋手。隻輪12月中到期，輪價96仙，負溢價0.02%，槓桿率12.9倍，因為已經冇晒溢價，所以有效槓桿率好貼近表面槓桿率，着晒數，而引伸波幅15%又係靚絕。想搏殺多幾錢，炒9876。
長實C輪：個市上，長實（001）冇乜理由會冇份，炒長實C輪有機會搵銀。太近期嘅長實C輪，街貨逐漸收乾，買賣唔係太方便。太遠期嘅，例如明年4月以後到期嗰批，畀10%以上溢價又有少少唔多甘心。又係行中庸路線，揀2249，明年2月夠鐘，輪價78仙，溢價4.7%，槓桿率8.9倍（有效6倍），引伸波幅31%。
電盈C輪：電盈（008）勉強收5.20元，叫做升1格，係屬於郁得少嘅藍籌。一片炒聲之中，買電盈或者電盈C輪，好似係冇乜進取嘅做法。不過，市場有招叫做炒落後，電盈本身亦都等緊同國內網通合作嘅消息，若然有下文，而條件又唔錯，則電盈可以一天光晒。以守為攻，買定啲C輪，主角係9814，明年1月到期，輪價56仙，溢價6.7%，槓桿率9.3倍（有效5.8倍），引伸波幅37%。
章盛