曼聯自從喺「丹麥鋼門」舒米高離隊後，一直搵唔到一個穩健嘅龍門，成為佢哋表現嘅絆腳石，好似美國龍門侯活咁，佢上屆加盟後的確表現好出色，但今屆就突然跌watt，由於喺上星期六對保頓嘅聯賽時犯錯，好多人都估佢星期三嘅歐冠盃作客里昂時會正選不保；不過曼聯領隊費格遜喺對里昂賽前話會畀佢繼續打正選。
「老費」果然冇出口術，喺對里昂時侯活仍然係正選，不過就又出事，喺輸畀里昂嘅第一球，就係因為侯活甩手，被里昂嘅克里斯補射入網；而曼聯最後就只係能同里昂打和二比二。
侯活表現失失慌，喺下星期一曼聯大戰利物浦的英超聯賽之中，唔知「老費」重會唔會保佢，畀佢踢正選呢？雖然曼聯到時有後衞李奧費迪南復出，但李奧停咗賽成八個月，能唔能夠適應比賽節奏重未知，如果老費唔搞掂龍門嘅問題，都幾擇使。
里昂前晚主場對曼聯，領先兩球最後都俾紅魔追和。我求大俠開賽前一直都有留意呢場比賽賠率走勢，皆因曼聯唔使讓波真係少有，結果開賽前曾經落飛落到曼聯高水情況下，先有人捧場。估唔到上半場經已輸兩粒，如果唔係雲佬幫手，真係又一次令紅魔捧場客損手。
前晚對於睇「絲帶台」直播嘅球迷，就衞星訊號問題，兩場波都多次出現畫面中斷。我求大俠就睇皇馬場直播到下半場，轉頭有番畫面就經已皇馬輸到兩球，雖然有慢鏡重播，但都好無癮。咁多年來直播波有問題唔出奇，希望遲啲冬令時間唔好再有呢種情況，話晒半夜捱眼瞓睇波好辛苦！
伯明翰件「車仔」借將前鋒科素，上季入波頻頻，但今季忽然無貨賣，聯賽開季五場仍然無進帳，主場球迷開始對呢位芬蘭前鋒喝倒采；領隊布魯士呼籲球迷停止呢種舉動，否則真係收起科素唔用！我求大俠想勸吓布魯士咪同呢班球迷作對，不如留番啖氣操起科素狀態好過啦。
維拉領隊奧拉利終於證實隊中傷兵後衞馬田拿臣，好可能要再養傷四個月。呢位季前從AC過檔嘅丹麥中堅，只係踢過三場聯賽就要「打柴」；講開傷兵，米堡嘅列斯加、車仔嘅洛賓、利記嘅紐尼斯等等，今季甫轉戰英超都難逃受傷患影響上陣機會嘅厄運，好似有新人必傷嘅魔咒咁！