被公認為靚女嘅日本女星上原多香子，經常有時裝雜誌搵佢影靚相。今年秋天，日本時裝界吹起五、六十年代嘅懷舊風，所以日本時裝雜誌《MISS》就特別搵多香子扮佢至愛嘅偶像柯德莉夏萍（AudreyHepburn）影番輯靚相。
柯德莉夏萍雖然已經離開人世，不過佢嘅電影，以至佢嘅一身貴氣打扮，仍然影響緊好多時下嘅女性，多香子就係其中之一，所以當雜誌《MISS》搵多香子扮夏萍影靚相時，多香子就一口答應。佢重話平日好鍾意作夏萍式嘅打扮，高貴大方得嚟亦保留一份少女味喎。
多香子嗰一身黑色連身裙嘅造型，一睇就知係來自經典電影《珠光寶氣》啦！多香子話雖然夏萍喺套戲入面係飾演一名上流社會嘅交際花，但佢高貴嘅打扮一啲都唔俗氣。而多香子抱住狗仔呢個嬌俏look，靈感就係來自電影《甜姐兒》嘞。另外，多香子重話今年秋天會好興及膝傘裙配襯圓頭高踭鞋，各位女士有興趣不妨一試。