港股調整僅1日，又再升過，而且創出今次升市的日中新高（13223）同收市新高（13209），成交更大增到158億元。大市氣氛好熾熱，國企股升勢果然強力發動，國指高收4488，大升138點，升幅3.1%，成交50.2億元，比上日的17.8億元大增1.8倍；今次乃係國指自6月以來第5次上衝4500點大關，由於有大成交支持，破位而上機會好大，初步目標指向5000點。
噚日好多國企都破晒阻力，熱門股中以馬鋼（323）升勢最勁，高收3.05元，升0.25元，升幅8.9%，一支大陽燭突破保歷加通道頂，且有5200多萬股的大成交配合，再飆上去，起碼可見4.5元。
其實，好多國企都似足馬鋼嘅走勢，好似其他兩隻鋼鐵股重鋼（1053）同鞍鋼（347）、中鋁（2600）、江西銅（358）、上海石化（338）同北京燕化（325）等，保歷加通道都係收到窄一窄，股價好明顯醞釀單邊市，唔係大上就係大落，今次向上突破，證明大戶一直以來的收集已完成，發動攻勢。
呢輪一直強力推介嘅江西銅，噚日升上4.0元後回番3.95元收，升6.7%，初步上升目標係4.5元。呢輪銅價升番上高位，對江銅好有利，高盛亦發表報告推介，指江銅跑贏大市，目標價亦係4.5元。
不過，高盛指全球經濟放緩，同埋美元預期會升值，無疑會對江銅未來的升勢構成不明朗嘅因素。
上石化嘅保歷加通道極少收到咁窄，噚日又係一支大陽燭破頂而上，今次「踢」上去，好大機會見3.5元。
重鋼噚日成交3200多萬股，比前日大增15倍，高收3.275元，升6.5%，略比馬鋼落後。不過，以走勢睇，今次衝破通道頂，再「踢」上去，好大機會上番4.0元水平。
04年（12月年結）上半年，重鋼營業額42.99億元（人民幣．下同），升64%，盈利4.96億元，升24%，每股盈利0.466元。下半年，鋼價由低位回升，估計全年盈利約10.5億元，每股盈利0.986元（折0.93港元），預期PE只係3.5倍，鋼鐵股中以佢最低，即使升上4元，PE亦只係4.3倍！
郭兆誠