港股衝上13000點大關，前後已11日，噚日調整，跌勢一度頗急，曾跌過140點，險守13000關口，但尾市又見有大盤趁低吸納，結果收13084，跌63點；期指表現強勢，收13118，高水34點。估計今次調整會持續兩三日，下禮拜再升過。
油價再升，投資者入市態度變得審慎，藍籌繼續調整，但國企股買盤仍多採取主動，令國指有7點進帳。內地股市再大升，滬A升4.2%，深A升4.6%，今日召開的四中全會，消息應對股市有正面作用。
電力股表現出色，華能（902）同大唐（991）都逆流而上，而民營的威華達（622）則高收0.53元，大升8.1%。資源股較突出的係中鋁（2600），收3.9元，升5仙，此股保歷加通道已明顯收窄，隨時出現突破，若升破4元，短線可見4.5元。
幾隻石化股亦好硬淨，正處於突破邊緣，一破位而上，就要追進。江西銅（358）大部份時間在3.7元水平爭持，暫時3.775元係阻力所在，升破而有大成交支持，初步上升目標係4.5元。銅業並非宏調要冷卻的對象，而銅價近日已由低位大幅回升，上海交易所每噸報價已升越29000元人民幣（每磅1.35美元），係4月中宏調開始後的最高水平。銅價升番上高位，對江銅好有利。
講番電力股，華能最值得留意，收6.1元，升2.5%，全日沽盤雖重（個個位都幾球），但來自多家大行的買盤亦毫不手軟，係咁食貨，成交2673萬股，連續第2日回升，睇個勢，只要突破頭肩底6.2元的頸線阻力，短線可向7.25元目標推進。
內地電力雖供不應求，但由於煤價上升，發電成本增加，令華能04年度（12月年結）上半年業績冇預期咁好。不過，下半年煤價的漲勢將放緩，而華能亦已簽署了兩份長期供煤合同，減輕煤價不穩定對公司產生的負面影響，加上未來一段日子仍有機會調升電費，因此，對華能而言，最黑暗的日子應已過去，現水平應係低吸的最佳機會。
04年全年，估計盈利64.0億元人民幣，每股盈利0.5港元，05年度可上升至0.61港元，PE12倍計，股價已可升上7字頭。
郭兆誠