精明消費：
筲箕大演進自轉瀝水快捷方便
筲箕，入廚必備廚具之一，記得阿媽年代，一個塑膠筲箕閒閒地都可以用幾年。但今時唔同往日，筲箕都演變出好多花款，有玩設計的，有具備特別功能的，就算一個普通膠筲箕都咁講究，想換走屋企個陳年古董？下面就有好介紹！
記者：黃婉冰
攝影：林栢鈞、楊錦文、周旭民
模特兒：Va（StarAsia）
自轉式瀝水器簡單快手
整沙律最怕材料水滴滴，用普通筲箕都未必可完全瀝乾水份，所以近年興起一種專門瀝水器，用法簡單、方便、快捷又妥當，而且款式重愈出愈多，啱晒要求快靚正嘅後生仔女。
連埋食物切割器
廚房地方有限，這款手攪式瀝水筲箕最適合，放上附有攪柄的膠蓋，就成為一個手攪式瀝水筲箕。換上附切割刀的蓋後，又變成食物切割器，更附送各款不同刀片，可用來切絲、切片及磨茸。
售價：$118(b)
顏色搶眼賣相前衞
有個靚靚廚房，廚具又點可以馬虎？這款手攪式筲箕，用色搶眼夠前衞，配上包有橡膠質料的欖核形手柄，唔怕跣手，有姿勢有實際。膠碗附有壺嘴設計，便於將瀝出來的水傾倒。
售價：$90(d)
有漏水位免倒水
嫌下下要倒水好麻煩，這款就最啱。桶形設計，膠蓋面設有入水孔，膠桶底部又有去水位，洗菜時可一邊入水，一邊攪拌，洗菜水就會慢慢由桶底的去水孔漏走，連水都唔使倒，乾手淨腳。
售價：$59.9(e)
壺形設計附設量杯
要做一人份量沙律唔知用幾多材料，呢款就幫到你。膠壺形倒水夠方便，膠兜重刻有量度，落幾多份量一目了然。拎走中間個筲箕又可以當埋量杯用，一舉兩得。
售價：$94(d)
不銹鋼質料硬淨唔走樣
凡事講求實際，要耐用唔要花巧，不銹鋼筲箕會係首選。有不銹鋼絲款式，又有全個以不銹鋼製成的，要幾硬淨有幾硬淨，日日用都唔怕走樣。深、淺、闊、窄、圓形、長方形俱備，落足眼力慢慢揀！
一拉就轉唔怕手軟
要不停咁攪好易手軟，想快手，可選擇這款手拉式。只要將繩大力一拉，內裏的筲箕就會自己快速轉動，拉兩三下就可以將水份瀝乾，容量又夠大，整大量沙律都應付得來。
售價：$128(c)
一按即停
只要將中間黑色圓形按鈕向下按，筲箕就會高速轉動，一按旁邊的黑色小按鈕就會立即停止。備有保險掣，將中間黑色按鈕Lock實就唔會彈起，操作簡單，啱懶人一族。
售價：$258(b)
摺得埋唔阻碇
這款單柄式不銹鋼絲筲箕，最適合細小廚房使用，筲箕身用軟身鋼絲織成網狀，設計就好似普通魚網一樣，一放低就會自己縮扁，既可掛牆又可放入廚櫃，收藏慳位。
售價：$90(d)
伸縮手柄可放上鋅盆
這款Buffalo筲箕，特別之處在於左右兩邊都設有伸縮手柄，拉出來後就可將筲箕擱在鋅盆上。手柄下有膠粒，可避免刮花鋅盆亦可防跣，洗完菜置於鋅盆上瀝水，慳位方便。
售價：$78(a)
雙重鋼絲唔怕變形
Buffalo出品，由兩層不同密度的不銹鋼絲網組成，鋼絲質料比例為18比8，鋼水夠晒實淨，雙層設計，雙重硬度，唔怕用幾用就變形。前端有兩個小鈎，可掛在煲面瀝水。
售價：$50(c)
曲柄設計可放煲面
要將剛灼完的食物瀝乾水，用這款特別設計的不銹鋼絲筲箕就最啱。曲線柄設計可以平穩地將筲箕擱在煲上，水份可以漏回煲內，用來煮麫灼菜都好方便。
售價：$115(c)
通花款樣靚耐用
要耐用又要靚？這款不銹鋼通花筲箕實啱心水！全個以不銹鋼製，襟用唔易變形，兩邊設有手柄，盛載熱辣辣食物都唔怕燙手，通花款式比傳統筲箕摩登。
售價：$75(g)
生果專用
一般筲箕都以碗形為主，但韓國SilverStar呢款就設計成碟形，可用來清洗生果，甚至充當生果碟。為免變形，鋼絲網面另加有一行行金色的不銹鋼絲做固定，兩邊設有掛鈎，唔用時可以掛起。
售價：$78(c)
塑膠質料功能選擇多
追求傳統，始終覺得塑膠筲箕親切啲？無問題，但要知道，就算膠筲箕都有好多種，要防菌、耐熱定係可以放得入洗碗碟機清洗？每個都各有功效同特色，價錢豐儉由人，想搵個符合自己的要求，就要落足眼力喇！
一套三件
想買多幾個筲箕又想歸一同慳位，可考慮呢套。一套有齊大、中、細三個Size，收納時可以用最大一個盛載起另外兩個，三合一放入碗櫃夠晒慳位。全以不銹鋼製造，耐用兼容易清洗。
原價：$248 特價：$198(c)
籃形設計出得廳堂
以粗不銹鋼絲製造，籃形設計，外形線條簡單前衞，又可充當生果籃，用來盛載五顏六色的生果，放在餐桌上都唔會失禮。款式入得廚房，出得廳堂。
售價：$90(g)
長膠手柄防燙手
韓國SilverStar出品，桃木花塑膠手柄唔會傳熱，加上手柄較長，可避免燙手，淺淺哋適合用來將麵過冷河。不銹鋼網面另加有一行行金色不銹鋼絲穩固形狀，可避免長時間使用而變形。
售價：$88(c)
免提式勾水龍頭
鋅盆太細，連容納一個筲箕的空位都無，這款都算是度身訂做。筲箕頂部設有掛鈎，可掛在水龍頭，洗完菜可以順手放入筲箕內，方便就手。
售價：$15(g)
可放入微波爐
老字號都要追上市場需要，好似紅A這款塑膠筲箕，一套兩件，有單柄式筲箕同膠碗，兩者同樣可以放入微波爐，耐熱度達130℃，耐冷度-20℃，放入雪櫃一樣無問題，更可放入洗碗碟機清洗。
售價：$50(d)
耐冷耐熱
好多時煮飯會貪就手，就咁將筲箕置於煮食爐旁邊，普通膠料好容易會溶甚至變形。日本Lavie呢款就有耐熱功能，最高可抵受120℃高溫，耐冷度-20℃，重有防菌功效，耐用又易清潔。
售價：$40(c)
售賣點
(a)西田百貨（26941111）
沙田新城市廣場第三期二樓
(b)Francfranc（31068958）
九龍塘又一城G-27舖
(c)崇光百貨（28338338）
銅鑼灣軒尼詩道555號
(d)LOGON（22658868）
九龍塘又一城UG-01舖
(e)GourmetKitchen（21750098）
尖沙嘴海港城3301號舖
(f)吉之島$10店（34282138）
銅鑼灣京士頓街9號家居廣場1樓
(g)city'super（25062888）
銅鑼灣時代廣場B1地庫
防菌質料易清洗
日本HOME&HOME出品，外形有如闊口湯碗，採用特別塑膠原料製造，具有防菌同防污作用，只有1mm闊的長形去水窿，用來放麵條都唔怕麵條漏出，清洗方便容易。
售價：$25(c)
經濟十蚊兜
呢款賣相雖然似足以前街市雜貨舖用嚟賣蛋嗰款，但查實呢個係日本貨，以樹脂製造，可耐熱120℃放入熱辣辣食物都唔怕溶，最緊要係價錢經濟實惠，$10有交易，平嘢唔代表無好！
售價：$10(f)