評馬Y係馬圈才子，好喜歡議員何秀蘭，一早下定決心投余若薇、何秀蘭一票。九月十二日，攤開《蘋果日報》，大字標題話李柱銘告急，李柱銘話唔可以輸畀蔡素玉。諗諗吓，評馬Y認為救李柱銘緊要，余何兩人，照港大民意調查，應該雙雙跑出啫。
九月十三日，評馬Y打電話嚟哭馬喪：「唉吔，原來《蘋果日報》幫蔡素玉助選，害咗何秀蘭㖭。我投咗李柱銘、楊森一票，唔少老友亦都如此，咁就益咗蔡素玉，等佢贏咗八百一十五票。」評馬Y好似喊到媽媽聲，慘過邱德根着得靚靚，冇得拉頭馬（因為九月十一日隻大熱門「人來風」跑第三），喺上海人面前失威。呢日中貿林帶來上海地產界重要人物入馬場觀光，一心跑第八場，叫上海老鄉落注「人來風」，好彩上海地產界叻人即是叻人，話「人來風」一點幾倍，唔抵賭，索性睇馬，為上海同鄉拍手掌好過。哈，「人來風」咁都輸得嘅！問上海叻人：「『人來風』係乜意思？」叻人話：「上海的孩子見親戚朋友來訪，歡喜到不得了，跳跳嚷嚷，我哋就話孩子『人來風』！」
邱德根公子亦在馬場，輸咗「人來風」，一定唔會跳跳嚷嚷！但係選舉之後，賓架陳、醫生陳等成班人都好似評馬Y咁跳跳嚷嚷，皆因佢哋全部睇晒《蘋果》，全部投楊森李柱銘一票，楊李組之多餘票有一萬三千幾張，全部浪費晒，可憐何秀蘭只係輸咗八百一十五票，搞到何秀蘭嘅擁躉「人來瘋」，人都癲！財務伍亦係「人來瘋」，因為會計界選出一個名不見經傳嘅譚香文，令財務伍支持嘅陳茂波輸咗三十七票！財務伍為之暈得一陣陣，打電話嚟問：「呢位譚小姐究竟係乜誰？」你問我，我問邊個？