銅鑼灣靚舖海鮮價，不少業主最後亦不敵買家價錢太過吸引而割愛，好似時興隆持有嘅怡和街三十八至四十號地下連一樓，各千三呎，獲多個買家出價洽購。噚日忽然傳出，渣打銀行以九千八萬連租約購入，每呎近三萬八。據悉可能自用。
該舖就近地鐵站，政府研究緊，隔籬將來起個全港首創嘅地下街商場，四周圍舖價自然水漲船高。市場傳出，連識印銀紙嘅渣打，都睇好後市接貨。
不過，現有地舖租客大班麵包及一樓髮型屋，就可能要另覓新舖。
發展商要谷商場人流，提高租戶生意額，各出奇謀，信和中港城、屯門市廣場同信和廣場，趁中秋節，搞個全港首創嘅「嫦娥inJenny服裝設計比賽」，以及展覽至in嘅日本Jenny珍藏版公仔。
蘭西亦都係Jenny迷，呢隻來自日本嘅俏娃娃，特別手工精緻，兼且服飾和面部表情千百變，每隻要過千大元。
本月十七日前，喺中港城同信和廣場展覽，九月二十八日，於屯門市廣場公開拍賣，fans不容錯過。
樓市暢旺，一二手單位大把買家承接，連銀主貨都賣得唔錯。利記何紹章話，上個月有四百五十八宗銀主盤成交，係按月新高，重連續四個月增加，形勢大好。
何紹章預期，價格相宜嘅銀主貨，會愈嚟愈受歡迎。筍盤梗係多買家吼啦！
喺八月易手嘅銀主盤中，天水圍嘉湖山莊係最多嘅屋苑，共有六宗，佔屋苑整體成交一成六，比例係各屋苑之冠；成交價與市價只差兩個巴仙。沙田一城則有三件銀主貨沽出，佔整體五個巴仙，但就低市價八個巴仙，似乎更吸引買家。
由於銀主貨受追捧，𠵱家放盤減到得番三千三百零個，係○二年五月以嚟新低。
今年樓市由豪宅帶動，但到第三季，情況有變，原因係所推出嘅新盤，以中小型為主。
美聯劉嘉輝話，截至本月十五日，第三季應市一手單位，有四千零五十個，八成八係中低價。豪宅比例由第一季嘅四成九，減至第三季嘅一成二。
劉嘉輝分析，由於七月底推出九成半按揭，吸引首期唔夠嘅買家上車，細價樓最受惠，發展商見到咁，梗係推多啲呢類單位搶客啦！
咁第四季又點呢？答案都係以中小型住宅為主，可以推售嘅九千一百三十個單位，七千八百多個係中細價，比例係八成六。
新地十年來冇喺荃灣賣過新盤，即將推出嘅爵悅庭，雖然係服務式住宅，宣傳攻勢強勁。
新地連日密集式同地產代理搞誓師。利記廖偉強噚日就話，會投放百萬金，做爵悅庭宣傳費用，重會增聘百人，應付呢個樓盤開售。
新地周國賢話，爵悅庭喺沙田新城市廣場嘅展銷廳，今個禮拜日就會開放，有個二十幾呎模型，方便介紹物業。
樓市係咪健康復甦，有時睇吓地產界中人嘅舉動，會略知一二。好似中原集團主席施永青，前日就羅列十大確認樓市轉勢理據，證明前景秀麗，但係佢噚日竟語出驚人，話自己其實唔係咁鍾意投資喎。
蘭西記得，佢舊年都入咗幾件貨，可見早就捕捉先機，施老闆話，自己入市之道，係「時機正確多於價格正確」，即係睇準時機入市至係最緊要。
恒基旗下將軍澳新都城中心商場，雖然係集團重點商場之一，但宣傳攻勢，好多時都集中面積最大嘅第二期，今次就輪到第三期。
聽講發展商將一樓闢做「旅遊地帶」，今個月正式開業。
現已有幾間本地旅行社承租，包括新華、美麗華、關鍵同專業旅運等，提供一站式旅遊資訊同相關服務，主力吸引同區及西貢區客。
蘭西
電郵地址：
