李宗盛同林憶蓮離婚呢件事，兩公婆都冇講真正嘅原因，同李宗盛十幾年老友嘅周華健，早兩日喺內地宣傳演唱會時，就話李宗盛冇同佢講過離婚呢件事，但以佢自己嘅分析，覺得李宗盛係因為感情生活太平淡，影響創作靈感所以離婚。
周華健話李宗盛係寫歌嘅，所以對環境嘅要求好高，𠵱家嘅歌大都係圍繞愛情，所以李宗盛對於感情上嘅刺激要求亦唔同一般人，重話呢個係李宗盛嘅宿命，家庭同事業，只可以得其一，最終佢選擇咗事業。
至於李宗盛嘅近況，周華健話可以用陽光燦爛去形容，重話李宗盛經常會講幾句好有玄機嘅說話，覺得佢嘅創作激情又恢復番喇。
一段感情完結，當然係雙方嘅問題，唔知周華健所講嘅，係咪李宗盛所諗嘅，但創作人，係咪一定要不停換畫同失戀先作到好歌？呢樣嘢馮仁昭真係好有保留，咁唔通寫黑社會古仔嘅編劇要去做黑社會先寫得出劇本？
曾經喺香港紅極一時嘅五虎成員之一湯鎮業，早前已離婚，佢老友吳岱融亦多次傳出婚姻有問題，佢哋近期雙雙喺內地發展。由於佢哋同樣擔任明星培訓學校嘅表演系教授，所以經常一齊出入，形影不離。最近有內地報章重指佢哋有過份親密嘅舉動，而當身旁嘅人問到佢哋關係時，佢哋竟然齊齊話：「我們的關係本來就非同一般呀！」講完之後重扮嘢攬埋一齊㖭！
女子組合at17將有機會同指揮家葉詠詩合作，下個月中舉行兩場音樂會，噚日佢哋喺中環開記者會，at17話今次難得可以同香港交響樂團合作，而個音樂會會分四季，佢哋演出冬季部份，主要係表演結他、敲擊樂同唱歌，而因為係第一次同葉詠詩合作，佢哋話要到正式綵排嗰陣，先知大家係咪配合得到。
余安安同囡囡前晚去咗灣仔會展欣賞有「樂壇大姑媽」之稱嘅英國殿堂級歌手艾頓莊（EltonJohn）嘅演唱會，兩母女不約而同着短裙到場，露出兩雙玉腿，頓成全場焦點。安安曾經話過囡囡都好貪靚，成日借佢啲衫嚟着，唔知囡囡身上嘅短裙係咪都係安安嘅呢？
