賭王的信德（242）同埋阿仔打理的新濠國際（200）先後公布業績，雖然兩間公司嘅業績都好靚仔，但股價表現就迥異，信德股價下跌，反而新濠就續創新高，莫非真係後生可畏？
經紀黃話唔係，皆因芬佬係向前看，覺得阿仔喺澳門搞酒店有概念，好過老豆專注本地地產。
信德前日公布截至今年6月底止中期業績，盈利有成2.27億元，比舊年同期勁升89.5%，中期股息派4.5仙。信德業績雖然靚，但芬佬都唔高興，噚日股價大跌6.67%，收4.20元，成交金額1.13億元，成交咁大，睇嚟唔少芬佬沽咗貨。
至於新濠，噚日公布截至今年6月止中期業績，成功轉虧為盈，盈利6009.4萬元，每股盈利24.84仙，中期股息派1仙。新濠噚日再升3.12%，收3.30元，成交金額6154萬元，最矚目係有一手交叉盤成15球咁多，造2.944元。
經紀黃話，聽聞係有芬佬要貨，佢哋睇好新濠新公布的澳門娛樂酒店項目，認為係新賣點。
慕容小初