本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如僱主或僱員有任何疑問，可致電熱線27171771查詢。
老闆：喂，燊仔，做乜今日呆呆咁嘅？
燊仔：唉！噚日收到稅單，今期要納重稅，我驚到時唔夠錢，睇怕𠵱家要開始節衣縮食喇。
老闆：唔使咁悲喎，年尾有雙糧幫補吓嘛。
燊仔：我有冇份㗎？我張合約寫嘅花紅，係唔係等如雙糧呀？我三月至入嚟做，唔足一年，如果到時你唔畀，咁我筆交稅應急錢咪凍過水！
老闆：哦，定啲嚟，我年年一月都準時出一個月花紅畀你哋㗎啦。況且，《僱傭條例》話咗，無論呢份「年終酬金」叫乜名，除非係屬於賞贈性質或者隨老闆鍾意畀或者唔畀，如果唔係嘅話就應該年年都有喇。
你係就係喺酬金期內做唔足一年，不過《僱傭條例》都有講明，如果減咗最多唔超過三個月嘅試用期之後，你喺公司都做咗超過三個月，咁就可以攞年終酬金喇。你三月入嚟，減咗一個月試用期，到年尾都做咗九個月啦，夠資格攞喇。計錢嘅時候，係會計埋試用期，即係話你可以攞到十二分之十嘅月薪。
燊仔：啊！公司實在太好喇，喺我有危難嘅時候，解我燃眉之急，我實在無以為報，惟有鞠躬盡瘁，死而後已，赴湯蹈火……
老闆：嘩！又唔使咁嚴重！你只要盡心工作就得喇。
以上資料只用作說明《僱傭條例》下的相關條文，對有關法例的詮釋，應以《僱傭條例》原文為依據。如有任何爭議，則以法院的判決為最後依歸。
資料提供：勞工處勞資協商促進科
服務熱線
電話：29908288
傳真：23702192
電郵：