日本Icup巨胸女星根本春美，遲吓將會喺朝日電視台搞嗰個《突然之間！黃金傳說》節目度，入住電視台宿舍，同其他參賽者鬥一個月內唔花超過七百港元。喺未開始比賽之前，今期日本雜誌《sabra》就公開咗根本入伙冇耐嘅香閨相片。
根本春美話佢搬咗嚟呢間新屋只有四個幾月，可能佢覺得一個人住比較寂寞，所以索性搵個自己嘅一比一攬枕嚟，重話夜晚攬住瞓會好瞓啲。根本又話佢近排忙到爆晒燈，所以冇乜時間好好裝飾佢間睡房。不過我羅拉就覺得佢身為女仔人家，間房似乎亂咗少少，個衣櫃塞滿晒衫褲之餘，枱頭又放滿化妝品，鞋櫃入面啲鞋又亂咁放，睇嚟都係時候要執吓間房喇！
另外，根本重公開咗佢嘅私人化妝箱，估唔到身為女星嘅根本，原來平時唔多鍾意化妝，成個化妝箱只係得幾支lipgloss。鑑賞完根本間新屋之後，我羅拉就認為佢大有機會贏埋朝日電視台搞嗰個比賽嘞。