日股跌137點，對港股昨午走勢有啲影響。恒指曾跌140點，埋單只係唔見64點。國內A股B股繼續急升，港股唔會衰得去邊。有平貨要買，有平輪要執，未係玩P輪嘅時候。
中移動C輪：中移動係第2大恒指市值嘅成份股，大市唔散，中移動唔會大跌，最低23.10元，收23.30元，跌0.20元，走勢反覆中向上，趁低撈啲C輪搵短線錢，主角係9907。
9907收17.3仙，跌8.5%。第2主角9813，只跌1.5%，9907相對跌凸咗。9907喺11月初夠鐘，溢價1.8%，槓桿率13.5倍（有效9.8倍），引伸波幅28.7%。9813都係數據唔錯嗰隻，但暫時都係9907靚啲。
中壽C輪：國內A股上升，保險股揸重國內股票，會有得益，啲錢擺喺有問題金融機構嘅不利消息，逐漸淡化。國壽（2628）收4.85元，有進帳5仙，跑贏人保（2328）同平保（2318）。國壽若然間歇性軟軟哋，可以炒吓相關C輪。
主角係9231，11月上旬夠鐘，輪價38仙，溢價2.7%，槓桿率12.8倍（有效8.8倍），引伸波幅31.4%。稍為長壽啲嘅9059，年底到期，輪價55仙，溢價4.1%，槓桿率8.8倍（有效6.2倍），引伸波幅34%，亦都有一顧價值。
平保C輪：平保收11.10元，冇郁，但C輪2238則由1.41元彈上1.49元，若然認為係正股上升先兆，則留意冇乜郁嘅C輪，例如2233，呢件明年2月到期，輪價1.40元，溢價7.2%，槓桿率7.9倍（有效5.1倍）。
章盛