自由黨主席田北俊捨自動當選取空降新東直選，可謂膽子不小，攞到六萬八千五十六票嘅佳績，當然好多人有功勞啦，田少亦好識做，早前喺香港答謝完一班擁躉之後，噚晚喺旺角火車站新世紀廣場嘅美心皇宮，筵開二十幾席，多謝各方友好義工朋友嘅支持，田少今次連記者都請埋。
田少成晚好受歡迎，各區嘅義工都爭住同佢合照，成個大明星咁，咁又的確係好多人，沙田、馬鞍山、大埔、粉嶺、上水、打鼓嶺、西貢等等、逐區逐組影，田少做人肉布景板，企足二十分鐘，實行任影唔嬲，之後敬酒就更激，有人竟然大叫「田北俊萬歲」，都唔好話唔得人驚。
田少笑自己七個星期前對新東並不認識，今次勝出後必履行諾言喺地區開辦事處，大家又即管睇吓佢是否兌現。又噚晚只有田少一人唱獨腳戲，黨員蔣世昌最落力，其他核心成員一個都唔見，唔知係咪各有各謝票。
（圖）新東嘅助選團同義工爭住同田少合照。
傳真︰2623-9278
電郵︰