特區立法會選舉，正如成龍形容人哋台灣，成為世界最大笑話，半途開箱，亂劈選票，胡塗官國興，千夫所指，本應以身作則，問責請辭，被迫回應，又百般卸膊！當日明明多個票站出現選民排長龍等候，有好多人來回多次，胡國興睜眼講大話，重話冇為選民帶來不便。
胡塗官又話，票箱太細，係「設計有問題」。真係好笑喎，籌備一場選舉，一年半載，胡國興平時四圍巡，查紙板、度海報，指手畫腳，佢最識得話人哋張海報太大，宣傳紙板太闊，獨係冇發覺到票箱太細，胡國興好詼諧，同威廉Hung做talkshow咪好？
身為選管會主席，胡某唔係第一次出嚟做，早在肥彭時期，立法局選舉，佢經已傍住肥彭行出跟入，有成十年經驗，𠵱家至發現票箱太細，即是一個廚神，炒咗二十年餸，突然間煲燶飯，問佢點解，佢話個沙煲設計有問題，唔關佢事！
八萬五唔關阿董事，沙士死三百人唔關楊永強事，票箱太細又唔關胡國興事，咁點解美國國會嚴正通過關注香港民主自由法案，又關陸恭蕙事？
請埋一班二打六嚟睇票箱，搞到選票通地亂劈，又話選票好「神聖」，神聖嘅就唔會好似舊報紙咁隨處一綑綑堆放冇人理？
胡國興百般狡辯，話選舉法例冇禁止工作人員半途開箱整理選票！冇錯，的確冇話唔得，不過法例亦規定整理票箱時一定要有選舉代理人員在場，防止狎玩選票做手腳！
當日多個票箱，半途打開，遭到工作人員「整理」，但在場選舉代理人員就被逐離場，有長達個半鐘頭！發生咗乜嘢事，天知地知！
整理選票又唔係唔見得人，使乜趕人離場？有何居心，咁驚走光，其中有乜不可告人嘅缺陷？公然違反選舉法，胡國興狎玩票箱，侮辱選民，令到香港變為拉丁美洲第三世界，蒙羞國際，胡某應即落台！
傳真︰2623-9278
電郵︰