浪子回頭金不換！候任議員「長毛」梁國雄同金勞詹培忠晉身立法會，為佢哋開心嘅，除咗屋企人同選民之外，重有一班當日陪佢哋度過鐵窗日子嘅懲教署職員。
八方收到一位自稱「懲教署一名小職員」嘅讀者電郵，佢話知道兩位曾受過牢獄之苦嘅更生人士可以成為尊貴嘅立法會議員，覺得好興奮，重整咗副對聯畀兩位贈興：「更生人士人生更精彩，立法議員議法立普選。」寓意兩位要為民請命，爭取普選。
話時話，更生人士成日俾人歧視，搵工難上加難，但兩位候任議員唔單止搵到工，重係一份咁尊貴嘅工作；八方建議懲教署請埋佢哋做代言人，拍埋宣傳片，畀其他更生人士一個借鑑。
長毛七九年曾因紀念四五天安門事件非法集會被判囚，九八年及二○○○年再因喺立法會抗議，被控藐視立法會而被判囚。詹培忠六年前因商業罪行入獄，未能完成立法會任期。
傳真︰2623-9278
電郵︰