究竟邊個車仔球員先至係佢哋位葡萄牙籍領隊摩連奴嘅愛將？唔係英格蘭中場林柏特，亦唔係葡萄牙後衞保羅費拉拿，而係象牙海岸前鋒杜奧巴至真。
車仔喺對巴黎聖日耳門之前喺巴黎王子球場練習，摩連奴就俾記者影到同杜奧巴咬晒耳仔兼攬晒腰；如果唔係知道佢哋兩個係領隊同球員關係，重以為佢哋搞基㖭。而喺前晚場波，當杜奧巴被換走之後，同摩連奴攬頭攬頸之餘重喺度講笑，兩個大男人friend到不得了。摩連奴賽後重話見杜奧巴入兩球幫球隊贏波，破例畀佢喺巴黎留多一晚，等佢能夠出席非洲足球先生嘅頒獎典禮。
杜奧巴喺馬賽過檔車路士後一路表現好穩定，難怪摩連奴錫到佢燶。但話晒摩連奴標榜自己係個紀律嚴明、一視同仁嘅領隊，加上車仔陣中有咁多球星，為免啲球員爭風吃醋，以及俾英國啲小報造新聞，我求大俠認為摩連奴佢都係低調啲好！
前日國際米蘭兩蛋贈不來梅，原來國米開波冇耐就踢多人一件重獲得十二碼，只係韋利宴客；好彩後尾國米再獲十二碼，阿祖安奴就補飛後再入一球。教練文仙尼賽後撐韋利，但係人都知韋利接二連三失機，只要馬田斯一傷癒就正選歸位。話時話，係韋利自己唔爭氣，與人無尤。
保頓終於簽埋國際米蘭棄將法迪加，連埋迪奧夫及奧高查，𠵱家保頓就有三件非洲頂級球星在陣，論呢個「非洲卡士」，更可謂世上無出其右。不過當大部份球會近年致力發展亞洲龐大市場，保頓就反其道而行「進攻」非洲市場，加埋甘普及希亞路，真係不賣靚仔賣好波囉！
養傷多時嘅稻本潤一，加盟西布朗之後終於同球迷會面，佢話復出目標會放喺下個月。不過，呢位日本國腳希望領隊美臣，唔會因為日前球隊發生打鬥事件，影響佢喺球隊執教前途，間接令稻本前景出現紅燈。不過，稻本似乎唔知早前美臣同球會續約傾唔成，佢真係有排擔心囉！
英超球會米杜士堡今晚喺主場對捷甲俄斯特拉法嘅歐協盃首圈首回合，係佢哋球會歷史上首場歐洲賽事，為咗隆重其事，佢哋就要求坐包廂嘅男性球迷要着西裝恤衫同打呔。話時話，球迷入場睇波不嬲都係着自己支持嗰支球隊嘅波衫，若然全部着到去飲咁款，場面肯定好壯觀。