地鐵，從1979年10月1日正式通車至今，九千多天連續接載乘客，風雨不改。2004年的今年，地鐵已度過了第25個年頭，並會陸續舉辦不同的慶祝活動，包括今周日推出25周年紀念票套裝。地鐵給你的印象，是電影《緣份》中哥哥與曼玉在地鐵車廂內你追我逐的浪漫情景，抑或是Danny仔的《幾分鐘的約會》中「地下鐵碰着她」？每個人的記憶都不同，今日就讓大家一起追尋吧！
記者：何善華
攝影：周旭文
部份相片提供：地鐵有限公司
四位於1979年出生的青年人，不約而同均是於地鐵首次通車的10月份「來到人間」，不經不覺已經跟隨地鐵同步成長至25歲，當中的關係可謂千絲萬縷。
記得地鐵公司喺1989年10月舉辦「十分興奮十周年」紀念活動，當時凡於1979年10月份出生的小朋友，都可到各地鐵站攞張登記表格填妥，不久就有專函寄來通知小朋友親身到位於九龍灣的地鐵大樓「拎獎品」。猶記得獎品豐富之餘兼且唔係人人有份，可以話係有錢都買唔到，如10周年紀念書包、10周年生日卡同埋紀念車票乙張。這四人實在受惠不少，更自稱為「7910」地鐵聯盟。
Philip話地鐵10周年時錯過了換取精品的機會，非常失望。但對於地鐵的感覺依舊充滿希冀，好似即將竣工的迪士尼公園，有傳聞明年會有一個新設地鐵站連接竹篙灣，到時便可以和家人一同乘搭地鐵穿梭往返。「重記得1997年7月1日香港回歸當日，地鐵特別推出了回歸紀念車票，我覺得呢張車票背後嘅意義非常大，可謂見證了另一段香港的歷史，好珍而重之咁收藏，將來再拿出來從頭細味。」
「我一向都無特別儲地鐵推出嘅紀念車票或精品，而我第一次肯排長龍買嘅車票，就係多啦A夢的紀念車票，重有一個好得意嘅多啦A夢手電筒，𠵱家都唔捨得拆出來。」Valerie表示自此之後除了心儀的卡通人物推出紀念車票外，往後的日子亦很難發現她會捱眼瞓排隊買票，不過近期的和路迪士尼系列、日本動畫大師宮崎駿電影系列和HelloKitty的紀念車票套裝，Valerie亦甘心花個多小時去輪購。
1998年地鐵新設的東涌線及機場快線正式投入服務，此舉無疑實現了Oliver的童年夢想。「我細細個搭地鐵就好鍾意昅吓車長的一舉一動，每當到達車站時總會伸個頭出去睇吓車長做緊乜，重記得有次俾車長鬧，叫我快啲縮番個頭入車廂內。」Oliver話車長給他的感覺好威勇又嚴肅，曾經憧憬自己有朝一日會當上車長載着乘客「周圍走」。而98年推出的東涌線及機場快線紀念車票套裝包括兩輛地鐵小型模型列車，可讓Oliver一嘗當「手動車長」的滋味。
地鐵公司差不多隔5年便會大搞一次周年紀念，每次的舉辦活動排列得密麻麻。今年正是地鐵通車25周年，你哋又知否地鐵即將會有甚麼新搞作？或許可以從過去的周年紀念而略知一二吧！
由1979年走到2004年，當中25年的歷史見證了香港的新舊變化，如港督更替、香港回歸、新機場開幕、地鐵上市等焦點新聞，而陪同着地鐵成長的每位香港市民，對地鐵過去25年的事迹，你又知多少呢？
1.地鐵公司第一代的荃灣線中，今天的「美孚站」，於當年是以哪個名稱命名呢？
2.於現時50個地鐵站中，哪兩個車站的相差距離最短途？
3.哪個地鐵車站有最多的出入閘機？
4.過去25年中，地鐵公司推出單程車票，最低的是多少票值？
5來往地鐵月台與地面的扶手電梯中，現時哪一個車站的扶手電梯，直達地底車站最具深度？
答案：
1.荔灣站
2.旺角站與太子站
3.九龍塘站，共66個
4.1979年，港幣1元
5.鰂魚涌站，最深達37米
至於「7910」地鐵聯盟的會員Wah，其實真正身份是本文記者。自細已愛儲地鐵推出的紀念車票，家中收藏的超過100套，連地鐵上市都參與成為股東之一。但留下最深刻印象的，是1996年推出的「電影一世紀紀念票」。「記得當日下着毛毛細雨，又因為趕住排隊沒有食早餐，排到中途已覺全身乏力，問前面排隊嘅人借白花油搽頭都無幫助，最後不支倒地暈咗。」醒回時發覺自己身處醫院，但最終都如願買了該次的紀念車票。不過原來地鐵公司收藏的紀念精品還不及我多呢！
