立法會選舉鬧得熱烘烘，獨不見飛天朱朱幼麟，八方記得佢早前話過會返大陸見朋友，但係冇理由咁耐都唔蒲頭，於是打電話問佢個辦事處啲同事，佢哋含含糊糊唔肯透露半句，後來終於有人話畀八方聽佢又唔乖闖禍啦。
再追查落去，原來飛天朱宣布唔參選之後又技癢，八月底返咗大陸某偏僻地方玩跳傘，一個唔小心，降落嘅時候失準，成個人跌咗落架車頂，幾條肋骨斷咗，塊面都腫晒，幸好佢老哥福大命大，執番條命仔，喺當地醫療休養，之後重返咗香港，當然投唔到票。
俾飛天朱嚇慣嘅朱太，本來已經冇氣勸佢，不過，今次見到佢傷成咁，亦好肉痛。後嚟因為放心唔落，屋企人將飛天朱送咗返上海，再搵名醫診治，一睇之下，先知真係好傷，要立即做手術搞搞佢。
飛天朱平日好玩，又好怕被人「瘀」，聽講佢第一次叫痛，可見跌得相當嚴重，八方但願佢早日康復回港，到時就知道實情係點。
（圖）經過今次事件之後，飛天朱有排唔飛得。
傳真︰2623-9278
電郵︰