曼聯今季黑過墨斗，除咗不斷有主力受傷，隊長堅尼重涉嫌毆打未成年少男，面臨牢獄之災。
英國警方噚日話，事件喺九月三號晏晝發生，地點喺堅尼屋企附近。當時十六歲嘅受害男童見到堅尼喺度放狗；但堅尼突然走過嚟襲擊佢，扯斷佢頸上條鏈，重攞狗帶鞭佢。少男報警後，警方就請咗堅尼返差館問話。堅尼有前科，喺九七年佢喺放狗時涉嫌毆打一名鄰居，但最後冇俾警方起訴。
曼聯今屆唔係太順利，啱啱先有布朗同雲尼斯達羅傷癒，加利尼維利又加入傷兵行列；喺英超亦踢得唔好，𠵱家差榜首阿仙奴成九分。
堅尼身為隊長，應該幫曼聯逃離低潮期，但幫唔到手之餘，重搞單咁嘅麻煩嘢。如果佢因為咁而搞到要坐監，曼聯高層同廣大嘅球迷真係多得佢唔少，所以佢好應該好好咁反省一吓。
經過奧運之後，二十歲前鋒泰維斯已經成為阿根廷球迷嘅新偶像；不過，喺星期一就有攝記報警話泰維斯喺夜店門口毆打佢。點解泰維斯咁躁？原來當時泰維斯係同埋佢嘅緋聞女友，二十六歲嘅豔星名模法絲一齊。為咗保護呢段「姊弟戀」，泰維斯咪被迫「出手」囉！
瑞典國腳前鋒伊巴謙莫域由阿積士轉會祖雲達斯後即刻做咗雙面人。事緣祖雲達斯會喺星期三嘅歐冠盃分組賽作客阿積士，伊巴就話出於對阿積士職球員及球迷嘅敬意，如果佢入波，都唔會慶祝。不過，轉過頭佢又出口術話阿積士嘅巴西後衞麥士維好快會離隊加盟祖雲達斯！
澳洲國家隊周二公布最新大軍名單，盡收各地精兵，維杜卡、基維爾、比斯安奴、艾馬頓等全入選。咁強陣容，對手好強咩？咪係世界排名一百二十六位嘅所羅門群島囉！教練法連拿呢次好似用牛刀殺雞咁，但我求大俠就認為佢可能玩嘢，睇吓邊個詐傷唔歸隊，引刀成一快就真。
巴西球星朗拿度最近俾佢喺一月舉行嘅婚禮搞到好鬼煩，因為有太多廣告贊助商想打佢嘅主意。「大哨」要煩嘅另外一樣嘢，就係重未落實邊個做證婚人，有消息話，證婚人好可能係意大利著名「光頭球證」哥連拿。如果呢個消息係啱嘅話，「大哨」嘅婚禮真係夠晒噱頭。