立法會選舉之前，中方勢力挖揭民主派嘅種種「醜聞」，抹黑謾罵，不擇手段。點知真正嘅醜聞，係喺投票之時嘅選舉行政大混亂，醜聞嘅主角就係平時「主持正義」，道貌岸然嘅大法官胡國興。
屯門、小西灣、將軍澳、港島多個投票站，都出現神秘封箱、驅逐政黨代理人嘅黑箱真空政治事件，三大功能組別嘅三名候選人，包括社福界張國柱、會計界陳茂波及有「政界關之琳」之稱嘅女藥劑師兼傳媒紅人龐愛蘭，紛紛指斥選舉事務委員會，指出收回嘅票數竟然多過發出嘅選票，唔知發生咗乜事！
藥劑師都話大劑，會計師都話條數唔清唔楚，功能組別得嗰區區幾百票，咁都一盤爛數，一塌胡塗，港島區、九龍東、新界西，選票郁吓三幾十萬，頻頻出現黑箱真空政治醜聞，遭到在場監督嘅專家大事抨擊，裏面有幾多蠱惑，可想而知！
大狀湯家驊親眼目睹，喺將軍澳，啲選票倒咗出嚟好似啲舊報紙咁隨處放，冇人理會，任啲風吹起，簡直係有如玩泥沙！
票箱細細，選票就大大張，入得幾張就迫爆，又唔係第一次選舉，直頭係有心玩嘢兼有陰謀。每一項技術錯誤，都經已違反選舉條例。胡國興知法犯法，執法就帶頭違法，除咗佢胡某人應該即時辭職，凡曾出現驅趕政黨助理離場、單方面封箱、開箱嘅黑箱真空政治事件嘅選區，為求科學、公正、客觀、理性、符合國際選舉標準，應予重選！
至於重選要浪費幾多錢，呢啲自然係特區政府嘅責任，當然最好就由胡官林公公兩個私人拎荷包補貼，因為公帑係屬於納稅人嘅。
正所謂公道自在人心，若然好似民建聯話頭，佢哋議席多，即是港人希望社會穩定、擁護愛國愛港，咁就真金不怕洪爐火，重新再投一次票，佢哋一樣會贏咁多，話唔定重會贏多幾席㖭！
陳水扁中咗一槍，國民黨都嗌重選，何況咁多個票箱中咗咁多暗箭。連功能組別三名候選人差幾十票都要上訴，咁直選點票咁多醜聞，點解就咁算數？港人民主無愧世界，胡官人馬狎玩票箱就令港人蒙羞全球！魔鬼在細節之中，真正嘅醜聞，原來就在票箱之內，打開黑箱，齊齊捉鬼！
傳真︰2623-9278
電郵︰