受到大陸宏觀調控影響，大陸地產股冇運行好耐，但最近多隻大陸地產股，特別係上海地產股，股價顯著回升。經紀黃話，皆因好幾間外資行睇過後，發覺大陸房地產空置比率雖然高，但主要係價格升得過急，影響市民置業能力，情況未算太壞，不致硬着陸。
近期上海批出預售樓花數量下降，供應量減少，而需求則有上升迹象，所以上海地產股近期回升相當合理。
好似年頭上市的上海復地（2337），股價近日明顯回勇，噚日又升5%，收2.10元，成交金額1699萬元。至於上海置業（1207）亦唔差，股價升4.35%，收0.72元，成交金額756萬元。
經紀黃話比較嘉歡上海置業，皆因上海復地阿媽在上海久唔久就傳出水緊消息，而上海置業就聽唔到呢類消息，早排公布中期業績盈利高過預期後，已有證券行調升盈利預測，而股價亦一路穩步上升，睇落相當對辦，雖然股價回升幅度唔細，但距離證券行1元樓上的目標價，重有一段距離。
慕容小初