人氣急升嘅孔慶翔WilliamHung，近日又嚟香港做宣傳同演講，今次下榻天水圍嘉湖海逸酒店，雖然呢位大忙人早出晚歸，不過酒店總經理徐英略都有機會同佢食早餐，重問佢有冇興趣喺香港置業。
又拍戲又唱歌又拍廣告，收入豐厚嘅孔慶翔就話，確實有意買車買樓畀屋企人，重有留意吓香港樓市嘅報道，不過認為樓價同美國比仍然較高，所以都傾向喺美國置業。佢今日就會離港。
據講，孔慶翔入住嘉湖海逸期間，有fans同記者喺門口守候，酒店員工唔放過機會，同佢影相留念。酒店咁熱情招待，佢就送出親筆簽名CD同海報，酒店方面決定，以抽獎形式，轉送畀周末自助晚餐顧客。
將軍澳只有兩個居屋苑，提供二百零呎嘅單位，其中一個係寶明苑，世紀21分行經理黃永佳話，B座高層二百八十二呎單位，有投資客喺自由市場一次過付款五十五萬買入，呎價一千九百五。
買家之前買咗兩個寶明苑同類單位，價錢梗係平過𠵱家啦，每個四十零萬，已經以每月三千二租出。今次呢個單位，估計月租三千五，回報六厘六。由於買家住呢區嘅居屋，睇樓一次就扑槌，加上手頭資金充裕，咪一筆過畀晒錢囉。
黃永佳話，呢類二百零呎單位，區內已經冇放盤，可見幾搶手。聽講，呢類單位吸引區內電視台員工，同啲單身客租住。
樓市好景，車位都多咗人買，美聯劉嘉輝話，今年截至本月十三日，錄得五千零八十三宗車位買賣登記，比舊年全年多四成一，預計全年近六千二宗。向發展商購買嘅，有二千六百七十一宗。
今年最多純車位註冊嘅屋苑，八個屬於一手新盤，將軍澳維景灣畔佔最多，有四百九十五個，第二位係尖沙嘴擎天半島，三百五十七宗。
屬於二手屋苑嘅，只有上環帝后華庭同又一村又一居，分別有一百五十七同一百二十四宗登記。
朗豪坊效應帶挈資深投資者麥姑娘，半個月勁賺二百七十二萬，好過一般打工仔做幾年。
據悉，麥姑娘月初以逾二千萬買入上海街四八一號地舖，八百呎，由東園電器以每月七萬四，租用至明年九月，唔夠半個月，就以二千三萬摸出，升值十三巴仙，估計扣除雜費賺近兩百萬。
旺角地舖搶手，但回報都唔錯，其中旺角道十九號地下八百呎，時裝店月租八萬，以近千三萬易手，回報七厘六。
西洋菜街二Y四號地舖二百五呎，時裝店月租七萬八，以千七萬售出，回報五厘四。
祈福集團佛山南海祈福南灣半島，上個禮拜六開放日，總共吸引近萬名番禺祈福新邨業主，同佛山周邊市民嚟參觀。當日共開放十個示範單位。
祈福南灣半島本月二十五日開賣，聽發展商講，到上周五為止，收到逾四百個內部認購，比首批三百戶重多。單位面積七百五十至三千七百呎。
中環國際金融中心二期，搞過跑樓梯比賽，而灣仔中環廣場今個禮拜六都有同類活動，幫匡智會籌款。
中環廣場發展商之一新地，贊助十名員工參加善舉，另動員新地義工隊，喺旗下商場籌款，又協助比賽安排等，實行出錢出力。
中環廣場樓高七十五層，共一千六百八十八級樓梯。今次比賽分公司隊同公眾兩組，個人組最少要籌到八百蚊至可參加，新地旗下商場有表格攞。蘭西問過，假如市民當日突然興之所至想去跑樓梯，臨場捐八百蚊，大會可即場幫佢辦登記手續，總之肯做善事就多多益善啦。
另外，新地之前話要喺元朗起好似「山頂加列山道七十一號」咁豪嘅牛潭尾項目，原來範圍內有啲附近村民嘅祖先墓地，新地𠵱家圍咗成個地盤，準備起樓，擋住村民上山祭祖條路，啲村民好唔高興，由鄉事委員會嘈到去區議會。不過，蘭西真係唔太明白，新地係專搞農地起樓嘅老手，不嬲同新界村民溝通都好好，今次居然搞出呢啲亂子，唔通係有人想攞多啲着數？
市建局前主席劉華森，以高價賣出西貢清水灣道清雅苑兩座洋房，套現五千萬。
消息人士話，位置鄰近銀線灣嘅清雅苑，由劉華森斥資興建，共有五幢洋房，其中三幢，早年拆售，劉華森只保留四及五號兩幢洋房，一幢自住，另一收租。
佢近排將兩幢洋房一併放售，各二千六百呎，每幢叫價三千萬。
唔少代理都認為叫價過高，估唔到最近真係有買家出到五千萬買晒兩幢，呎價超過九千六，創區內洋房近期新高。
蘭西
電郵地址：
