噚晚英國駐港總領事館門口人頭湧湧，原來有個頒獎典禮喺裏面舉行，吳光正、郭炳湘、李澤鉅（圖左）以及潘廸生都係獲邀嘉賓，表揚佢哋推銷英國品牌有貢獻喎，連咁嘅獎都有得頒，英國佬真有腦。
小超係代佢老竇出席，佢前後都有保鑣，冇人行到埋身，吳光正亦冇講嘢，只有胡應湘招呼吓啲行家。
另外，唔知大家有無留意有一本政治諷刺嘅英文雜誌《Spike》，呢本出版咗十個月嘅雜誌噚日宣布停刊，停刊原因就係因為搵唔到資金支持。《Spike》嘅方針同佢個名一樣咁頂心頂肺，好多時都同香港政府唱反調，創刊時重諷刺過特首夫人Betty，真係唔知死，八方聽聞雜誌搵唔到老細，同佢嘅立場有好大關係。不過，香港啲報刊愈嚟愈惟中是命，容納唔到其他聲音，八方身為傳媒人，都有啲欷歔。
傳真︰2623-9278
電郵︰