恒指高低波幅82點，埋單微升8點，算係和氣收場。個勢仍然向上，稍作整固之後，恒指有機會短期內上試13500。
恒指C輪：大市買升，自然可以直接打恒指C輪主意。恒指C輪正路之選係9911與2137。9911年底夠鐘，輪價19.6仙，溢價2.2%，槓桿率15.6倍（有效10.2倍），引伸波幅20.4%。2137亦係年底夠鐘，輪價21仙，溢價3.1%，槓桿率17.4倍（有效10.4倍），引伸波幅21.5%。兩隻輪數據都好靚，交投亦非常暢旺。
9911與2137成交金額分別係1.11億元與半億元，金額排名榜上做阿2同阿4，已經相當犀利，但及唔上新簇簇嘅4442。4442面世7日，明年3月到期，輪價21.2仙，溢價5.8%，槓桿率14.4倍（有效7.8倍），引伸波幅23.4%。單日成交5.27億份，佔發行量8.88億份嘅6成。上網摷料，隻輪街貨得1.5%，街貨咁少，理應冇咁大成交，隻輪真係怪怪哋。正路炒恒指C輪，揀9911與2137。呢件新嘢，變化可能未必跟足恒指，可能跑贏可能跑輸，貨源左右輪價。
國壽C輪：上海A股與深圳A股同升3.2%，喺亞太區股市中稱王。國內保險股揸重A股，所以有啲勢，國壽（2628）見過4.875元，收4.80元，升得1個位，但隻國壽熱門C輪9231一彈就係12%，收37仙。
隻輪重有唔夠兩個月命仔，溢價3.5%，槓桿率13.0倍（有效8.3倍），數據勉強可以接受。單日嫌升得過速，吼平啲至上車。
章盛