究竟豆腐係咪淨係可以做豆腐花呢？身為家長嘅藝人陳芷菁噚日喺亞視嘅「GoodAfternoon局長」教育分享會節目上，難得遇見教統局局長李國章，即刻捉住佢投訴，原來佢對於教師質素參差憤憤不平，聽聞有老師居然話學生答「豆腐可以做豆腐乾」係錯，覺得好唔合理。
陳芷菁個女雖然得九個月大，但佢四個月前已經搜集晒幼稚園入學嘅資料，佢投訴政府嘅母語教學政策唔一致，又覺得教師質素有問題，「有啲會話你個仔好蠢呀，連個『腳』字都唔識寫，咁個『腳』字咁多筆畫……又或者話你個仔呀，無畫畫天份，油顏色油到出晒界！」最尾重語重心長咁話，「李局長，我覺得你嘅決定真係好影響我細路仔嘅一生！」聽到全場拍晒手掌，睇怕亞瑟王從來都無諗過，原來咁多人嘅命運操縱喺佢手上，唔係佢點會殺校殺得咁過癮！
順帶一提，由九月二十七號起，逢星期一下晝兩點半喺亞視本港台「下午麼麼茶」時段，會播出一連十集嘅教育特備節目，內容包括中一派位機制，同埋家校合作等。
（圖）李國章喺電視節目教育分享會上同學生交流交流，唔知佢明唔明學生要啲乜呢？
黃建通攝
傳真︰2623-9278
電郵︰