孔慶翔（WilliamHung）前日又返咗香港，噚日行程非常緊密，朝早去咗香港大學同班學生交流，佢話學生嘅問題同記者一樣咁難答，離開時有個男同學搵佢簽名，佢就話好趕時間唔簽，結果嗰個學生唔知係報復定係見William「太可愛」，竟然搣咗佢塊面一下。
之後William去咗樂富吉之島行街，途中有男仔叫佢簽名影相，佢即刻拒絕咗，但係當有個靚女叫佢影相嗰時，佢又好樂意喎，真係幾識揀。跟住佢去咗港台做錄音訪問，車淑梅問佢重有乜嘢夢想未完成，佢竟然答話係身體健康同一帆風順，乜夢想唔係應該講一啲想做嘅嘢咩？佢果然有智慧。
而當記者同William講噚晚六合彩有成七千幾萬彩金，佢對眼就即刻發晒光，猛話要去買六合彩，重話中咗嘅話要環遊世界㖭。
William兩父子最終受唔住七千萬彩金嘅誘惑，而去咗尖沙嘴買彩票，但William話從小唔賭錢，所以佢唔會買六合彩，結果佢阿爸就一個人行入去投注站，但兜咗一個圈就出番嚟，佢話因為太多人所以唔買啦。跟住William又行咗去附近嘅VCD店，買咗偶像黎明新出嘅CD，的確夠捧場。
周麗淇（Niki）早排幫雜誌《新婚通信》影婚紗同晚禮服嘅靚相，佢話當年戴安娜王妃嘅世紀婚禮，令到佢亦十分憧憬自己可以好似公主咁出嫁，Niki話：「我希望婚禮喺教堂舉行，我頭戴皇冠，穿上好長好長嘅大拖尾婚紗講『我願意』嗰一刻，感覺一定好浪漫！」佢重話搵意中人最緊要望落順眼、心地善良、愛護小動物同尊重老人家，要求多多，不過都好合理。
張栢芝早前同珠海嘅東洋之花化裝品有限公司、重慶家樂福連鎖超市有限公司為肖像權糾紛一案打官司，結果噚日得到重慶市第一中級法院判栢芝勝訴，東洋之花喺判決後嘅一個月內，要公開道歉同立即停止侵權，重要銷毀侵權嘅產品兼賠償栢芝五十一萬人民幣嘅損失，當中另一被告重慶家樂福亦要承擔一半（二十五萬五千）賠償。栢芝經理人李小姐對於贏官司，能夠為栢芝取回公道表示好高興。
李心潔今年獲馬來西亞吉打蘇丹賜封AMK後，佢噚日又接到通知獲得「馬來西亞十大傑出青年獎之文化成就獎」，呢個頒獎禮會喺下個月二號舉行，李心潔透過經理人葉如婷喺長途電話度話：「能夠得到這個獎項，我感到很榮幸，而且這亦是我首次以演藝人身份獲得此獎，我一定會親自返大馬領獎。」
