華仔、小倩紅館訂盟約

吳倩蓮前晚應邀擔任好拍檔劉德華的個唱嘉賓，一出場便受到全場觀眾熱烈歡呼，由於小倩已多年未有踏足紅館，所以她為了今次表演而勤加練歌，除了唱出多年前的經典金曲《天下浪子不獨你一人》外，又與華仔合唱《月亮代表我的心》。

望再結片緣
演唱會中華仔亦不忘向小倩賣口乖，他說：「啱啱你出場時，大家都認唔到你，因為你好似冇老過，完全同以前一模一樣！個個都以為你係假嘅！」而華仔又謂十分希望再與小倩結片緣，小倩聞言開心地說：「咁我等你！」華仔即笑說：「今年未必有時間，我睇下年啦！就喺呢度約定，我哋就開部叫《華倩之戀》啦！」
小倩今次專程從台灣來港，全因華仔收到不少歌迷的電郵，表示很希望見到小倩出現，在徇眾要求下，華仔親自致電邀請這位老拍檔，小倩便放下工作來港。