金勞詹重返立法會終於如願以償，佢在業界有無數fans，佢老人家噚日再當選，炒家立即炒高佢旗下股票作為慶賀，其中最矚目當然係駿雷國際（070），最高見過1.7仙，收1.5仙，升幅25%，成交股數有3.38億股，金額496萬元。
經紀陳話，講明係搞慶賀，隻股自然都唔會有嘢跟尾，放完煙花就算數。另外，由於公司業績公布期仍然未完結，所以有個別股票仍然炒業績，好似思捷環球（330）近期股價屢創新高，昨日一度突破40大元關口。
經紀黃話，皆因思捷在本周三公布的全年業績，已經唱通街話會靚到你唔信。
噚日大市氣氛良好，思捷股價最高見過40.20元，收39.40元，升5.35%，成交股數280萬股，金額1.1億元。
小初到家陣都唔明，點解歐洲有咁多時裝品牌，思捷仍然咁好賣，但既然芬佬同分析員個個都話得，小初又點敢說三道四，亂咁撥冷水。
慕容小初