奧運金牌明星來港做騷，好似鴨仔咁俾人操控，有失尊嚴；其實尊重英雄，請佢哋出席一次無所謂、歌星夾口形播碟的大球場盛會，表演一次佢哋擅長嘅項目，已經足夠，其他時間請歸還畀啲運動員，等佢哋開開心心去行街購物。達官貴人為咗要同英雄握手、攞簽名，佔盡便宜，用以前嘅講法，就係「勞役人民嘅罪證！」
金牌英雄深夜購物，爭取一分一秒嘅空閒時間，可反映出內地客來港旅行嘅最大慾望，唔怪得啲珠寶店笑逐顏開。珠寶S老早約咗左丁山飲茶，見到佢當然問佢：「自由行遊客有冇益到你？」珠寶S乃謙謙君子，作風殷實，不打逛語。佢好認真咁講：「我哋做出口生意多，零售生意唔再做咯，自由行遊客鍾意去名牌珠寶店，周大福、周生生最着數。其實我哋以前都有做旅行團生意嘅，但旅行社要求回佣，逐步進逼，由十幾個佣去到三十個，想食埋我隻車咩，於是索性連旅行團都唔做，放棄零售。」
回佣三十巴仙，重有冇得執呀？珠寶S話：「我嘅作風係貨真價實，絕唔會將一百蚊嘅貨，叫價二百蚊，然後回六十個佣。呢啲橋行唔通嘅嘞，好多遊客鍾意自己行彌敦道，唔鍾意俾導遊指指點點。做呢行，始終係老牌子以品牌取勝，噱頭可以吸引一時，難以持久。淨講噱頭，唔計貨真價實嘅，就會變成日本郵船，遲早完。」
珠寶S叫埋單之時，拿出一枝金筆簽卡，一睇就知靚嘢，珠寶S話：「呢枝筆係以前與陳松青做買賣時，簽文件嘅紀念品，有留念價值。」陳松青已經行完人生一個圓圈，向上爬↓威到盡↓坐監↓歸於平淡，珠寶S仍然屹立不倒，做生意真係唔可以短期論英雄㗎。