馮仁昭四圍超：
喜多郎琴音悼阿梅淚盈於睫

日本NewAge音樂大師喜多郎，前晚喺灣仔會展舉行音樂會，音樂會尾聲奏起《酒干倘賣無》悼念梅艷芳嗰陣，喜多郎激動到眼濕濕，佢重話阿梅精神永遠長存。
喜多郎前晚喺會展開騷絕無欺場，喺兩個鐘頭嘅音樂會上，佢傾盡全力，唔止好投入咁彈電子琴，重同樂隊成員一齊鬥彈電結他，最吸引觀眾嘅係喜多郎出全力打日本太鼓，震撼全場。佢又演奏咗樂迷耳熟能詳嘅名曲《絲綢之路》同《敦煌》嘅主題曲，令在場樂迷如癡如醉。

「精神永遠不死」
到咗音樂會尾聲，喜多郎就用口琴奏起蘇芮名曲《酒干倘賣無》，成晚冇乜嘢講嘅佢，重揸住支咪用英文對台下觀眾好激動咁話：「上年十二月我聽到一個好哀傷嘅消息，佢雖然去世，但佢嘅精神係永遠不死，佢嘅精神重喺度，我哋仍然可以永遠同佢連繫，佢係AnitaMui（梅艷芳）！」講到激動處嘅喜多郎重忍唔住流下男兒淚，最後送上一曲《LightoftheSpirit》畀阿梅。
音樂會完畢之後，喜多郎喺後台同組合女生宿舍見面，被佢大讚兼任開場嘉賓嘅成員之一Elise就話：「喜多郎嘅音樂真係大師級，我會以佢為目標！」

鄭欣宜發聲明拒追訪
沈殿霞愛女鄭欣宜自細都成為傳媒焦點，尤其係當佢減肥成功後，又拍纖體廣告，又以佢嘅減肥血淚史出書，梗係成為記者追訪目標，不過佢噚日就親自寫咗張聲明傳真去報館，話佢已經返加拿大讀書，希望記者唔好再不停咁追訪佢，咁樣會對佢嘅學業造成影響。馮仁昭覺得欣宜咁恨入行，應該要明白到食得鹹魚抵得渴嘅道理。

周星馳唔去加國首映
周星馳同「翻版栢芝」黃聖依合作嘅新戲《功夫》，本來喺香港時間聽日喺「多倫多國際電影節」舉行首映。星爺好重視呢部戲，佢身兼編、導同演三職，全程都好緊張，佢又專登搵咗電影《蜘蛛俠》嘅音效大師幫《功夫》做最後修改，但星爺好忙，所以最後都係決定唔去首映，交畀女主角撐場。

黃伊汶胸震何潤東
黃伊汶同何潤東噚日喺柴灣影樓為纖體公司影廣告相，咁啱係何潤東二十九歲生日，大家一齊切蛋糕慶祝，黃伊汶重送咗副太陽眼鏡畀對方做禮物。黃伊汶同何潤東影相時要胸貼胸擺甫士，何潤東話雖然感覺到對方個胸，但就冇尷尬，佢又讚伊汶身材好，重俾佢電親㖭。黃伊汶就話大家貼身影相時，只係覺得何潤東個身係咁震。