金像影星積尼高遜（JackNicholson）曾經係爛滾友一名，但近年佢修心養性，放多咗好多時間喺家人身上，唔只得閒嗰陣會陪仔仔睇球賽，前日佢重現身紐約時裝展，親身上陣行天橋sell個女嘅設計，真係絕世好爸。
積尼高遜個女珍妮花（Jennifer）呢排喺紐約時裝展上展出個人品牌新裝。近年少咗四圍𠝹女嘅阿積，前日就着上由個女設計嘅西裝行天橋，估唔到阿積做戲叻，行天橋都一樣掂。雖然阿積嘅身形唔及專業模特兒，但見慣大場面嘅佢喺天橋上氣定神閒，一啲都唔失禮，重吸引台下唔少師奶fans爭相拍照，直情搶晒在場模特兒嘅風頭。
不過，身為專業名模嘅納奧美金寶（NaomiCampbell）當然唔想俾阿積搶晒風頭啦，佢前日亦喺紐約時裝展出現，為巴西設計師CarlosMiele行天橋。聽聞納奧美出騷嗰陣要求多多，又唔鍾意同其他模特兒一齊換衫，又唔想其他人見到佢化妝。此外，奧遜姊妹花艾絲莉（Ashley）同瑪莉姬蒂（Mary-Kate）前日都有捧場。