港股高收，恒指進帳135點，收報13139，直撲上周四高位13190。「911」大步檻過，美股冇事，將繼續領導全球股市向上。上周五美股上升之後，昨晚歐洲股市初段，亦都好好睇睇。
中銀C輪：中銀（2388）收14.30元，升15仙。上周五最低13.90元，彈番上嚟好有力，上次高位14.50元，隨時話破就破，搵中銀C輪短炒乃搵銀之道，正路之選係9169，明年2月夠鐘，輪價21.3仙，溢價1.5%，槓桿率6.7倍（有效5.8倍），引伸波幅21%。其次9981，明年3月初到期，輪價18.2仙，溢價3.7%，槓桿率7.9倍（有效5.8倍），引伸波幅27%，論成交，9169多好多。
若然想刺激多多，則揀9218，呢件係末日輪，收3.6仙，單日急升20%，負溢價0.4%，槓桿率39.7倍。因為已經冇晒溢價，所以有效槓桿率同表面數字一樣，勁到飛起，亦即係話輪價會飛沙走石，正股再起多兩三個巴仙，隻輪有權升1倍。正股（現價14.30元）若跌到13.90元以下，則隻輪乜都冇得剩。下周三最後交易，買呢隻輪要有心理準備贏輸冇得守。
國泰C輪：油價再跌，東航（670）、南航（1055）上升，但冇C輪可炒。國泰（293）收13.95元，升15仙。國泰C輪值博率最高嘅係9170，年底到期，輪價18仙，溢價2.5%，槓桿率7.8倍（有效6倍），引伸波幅30%。太古（A，019）係國泰大股東之一，亦都受惠，不過股價近期升得頗急，買太A認購輪暫時宜等一等，有平貨上車，水位先至夠吸引。
章盛