被譽為全世界最高水平嘅意大利足球聯賽終於開鑼啦！球迷最關注嘅除了係自己追捧嘅球隊戰績如何外，相信亦會密切留意球會精品幾時會返貨，好讓瘋狂球迷們第一時間搜購球衣、球會帽、電話吊繩、銀包手袋等日用品。而繼日本之後，全球第二間羅馬官方球會專門店最近亦成功攻陷本港，祖雲達斯、國際米蘭甚至上屆聯賽AC米蘭都要甘拜下風，今日就率先帶你走進意大利的羅馬世界啦！
記者：何善華
攝影：陳智良
模特兒：Elaine（Imagine）
講到意大利聯賽最好波嘅球會，羅馬未必係Number1，但論到意甲靚仔球星排行榜，有「王子」之稱的羅馬隊長托迪例必三甲之選。最近羅馬重喺香港開設首間官方商標的球會專門店，全部產品包括球衣、便服、日用品等都係原裝由意大利嘅羅馬球會售賣店空運到港，實在是羅馬球迷的天大喜訊。
「當年去意大利入貨，要當面同球會主席坐低傾，都咪話唔大陣仗！」已有10年親身到意國揀貨嘅球迷世界老闆Kenny表示，因為工作關係而認識了當時意大利球證協會主席，在其穿針引線下到了多間意甲球會，如祖雲達斯、國際米蘭、AC米蘭、熱拿亞，向各間球會高層表明「刮貨」來意及提出新一套的球會精品銷售策略，10天內不停在米蘭、都靈、佛羅倫斯、羅馬等地「兜兜轉」，最後成功引入當時最新鮮的球會精品，開拓意甲精品的香港市場。
「𠵱家每逢球季開鑼前或者跟踢波團時順便去埋掃貨，主要會選購港人較熟悉的球會或球星精品，但今年費倫天拿重新升回甲組，情意結嘅關係我都冒險引入唔少精品，如果今季踢得好去貨就一定好快。」談到在意大利搜貨時的難忘經歷，Kenny說：「唔好一個人去米蘭、拿玻里或西西里島，因為那裏充斥着大量的吉卜賽人和東歐難民，佢哋會當你係日本人，光天化日都可以明偷暗搶，我都曾經中過招啦！」
由DIADORA出廠的羅馬球會2004-05年度的球衣，分別為紅、白、橙三款不同顏色，由細碼至雙加大碼的尺碼均十分齊全。球衣中間為羅馬球會會徽，以「狼」為標記。衣物質料貼身而富彈性，具滑手及防皺功能，踢波唔會咁易畀對方扯爛件衫。售價：$499（d）
白色主題襯紅色肩膊位的羅馬便服T恤，特別之處在於衣背印上10號「羅馬王子」托迪及18號卡斯辛奴的字樣，支持羅馬唔一定要着波衫嘅！售價：$290（d）
有黑色及橙色兩款的羅馬小型玩具足球，適合作培養小朋友對足球興趣的「培訓產品」，足球上同時印上羅馬球會會徽及asromaStore。售價：$150（d）
潮流興着住件波衫當Fashion，球會精品成為潮流物之一。黑色袋身配白色挽手帶的保齡球手挽袋，拉鏈式設計。女士們喜歡它可能不是因為羅馬的緣故，而是它的款式！售價：$350（d）
日用記事簿有A5及A7兩款日記簿紙張尺寸，內附一年球季的日程表、年曆表、電話簿、備忘錄等，提醒你每逢周末都有羅馬嘅賽事，幫球會打打氣。售價：大$160、細$120（d）
托迪為「生招牌」的水杯，特別印上托迪本人的足球照片及親筆簽名，有耳杯設計方便易用。售價：$130（d）
香港唔少足球精品店都有引入意大利聯賽隊伍的別致精品。趁着意甲啱啱開鑼，唔少舖頭最近亦開始大量返貨，新貨到就梗係要第一時間去搜括一番啦！重點推介以下三款精品：一代球星巴治奧退休的懷念收藏品、上屆意甲盟主AC米蘭的冠軍精品，以及昔日紫衣兵團的費倫天拿重返甲組聯賽的第一擊頭炮產品。
「老來嬌」巴治奧以上季作為球員生涯的總結，效力意甲中下游隊伍布雷西亞，經常在重要時刻射入奠定性的入球，可見一代金童本色。這件特別刻有巴治奧名字的布雷西亞落場版球衣，可視為紀念品珍藏！售價：$699（b）
巴治奧由費倫天拿出身，曾效力過祖雲達斯、AC米蘭、博洛尼亞、國際米蘭及布雷西亞球會，當過1993年世界及歐洲足球先生。但最為球迷津津樂道的仍是他那長長的馬尾，如今只有翻看巴治奧足球生涯回憶錄DVD，重溫他當年的球場英姿了。售價：$299（b）
最近新到的4款意甲球星公仔，除了AC米蘭守門員迪達的售價要$100外，其餘3位球星包括祖雲達斯的杜陀、羅馬的卡斯辛奴及帕爾馬的費比，售價一律$75。售價：$75-$100（a）
帽子上的一粒星代表了意甲球隊要每奪得10次聯賽冠軍才可加冕，足見AC米蘭在意甲球圈的顯赫地位。牛仔布料設計的官方球會帽，不少AC米蘭球迷均以戴着帽子以表對球會嘅忠心。售價：$119（c）
今屆升回甲組的費倫天拿，為慶祝球會升班而設計了一系列的球會精品。這款球會防水鋼表備有100米防水、外框計時圈等功能，表帶用上藍色麻布雙重魔術貼，穿戴上不會輕易鬆脫。售價：$299（b）
以紅×黑為主題的AC米蘭，其Q版球星電話吊繩有馬甸尼及恩沙基兩位球星作招徠，售價$119。而以球衣為主題的電話吊繩為$129，同樣以9號仔恩沙基掛帥。售價：$119-$129（b）
今屆意大利甲組聯賽有一個奇怪嘅現象，就係唔少球星出國搵食完後，今屆都重返意大利，好似車路士棄將基斯普及華朗。而日本國寶中田英壽就由帕爾馬轉會至升班馬費倫天拿。
至於今屆一如既往繼續保持意甲的優良傳統，靚仔球星依舊充斥在聯賽當中，計有AC米蘭中場新寵卡卡、羅馬孖寶托迪及蒙迪拿，而祖雲達斯亦於荷蘭阿積士購入瑞典高大前鋒伊巴謙莫域，每位球星都有板有眼，身材勁弗之餘球技又了得，不愁要坐冷板櫈無緣同各位女士們見面。
9月26日：國際米蘭對帕爾馬
9月26日：拉素對AC米蘭
10月3日：羅馬對國際米蘭
售賣點
（a）352大本營（27707352）
地址：旺角西洋菜南街38-40號萬高大廈9樓
（b）球迷世界（23697822）
地址：旺角信和中心3字樓05室
（c）SFALO（23900004）
地址：旺角通菜街8號地下
（d）asromaStore（31042202）
地址：尖沙嘴加連威老道63B號地下
