近排香港有錢人買幾千萬樓，眼都唔眨，可能連澳洲都知，悉尼市近郊區PointPiper一幢別墅，就透過世紀21，今個月二十四號喺香港拍賣。
業主意向價要成千一萬澳元，折合港幣成六千萬，價值不菲。
根據世紀21嘅資料，由間別墅行幾分鐘，就到RoseBay港口或者RosebayYachtClub遊艇會，搭十五分鐘水上的士，就會去到悉尼歌劇院同埋悉尼海港大橋。
世紀21拍賣部聯席董事蔡漢陞話，整幢共五層連地庫，總樓面逾萬四呎。
港人對澳洲樓市認識唔多，要隔咁遠買間咁高價嘅物業，間屋有幾靚，淨睇相真係好難講。不過，蔡漢陞話，𠵱家澳洲房地產投資回報，每年平均有一成半到兩成喎。
喺政府優惠同快捷計算嘅補價鼓勵下，近年發展商起樓，興加番個露台，樓價急速反彈，露台價值自然水漲船高。
蘭西最近聽講，為免益咗發展商，政府想將露台補價，用番市價去計。點知大孖沙發展商收到風，話好唔鍾意，搏命反對，而勢弱嘅政府，意識到阻力好大，好似話已經縮咗沙。
露台同工作平台現行補價係分區、依大小以劃一計，好似最貴嘅香港同九龍豪宅，每呎都係一千七百幾。但以賣近貨尾嘅九龍塘畢架山一號做例子，每呎賣成九千幾，扣埋建築費，每個露台都淨賺幾十萬，六百幾個單位，就賺成億幾，都幾和味。
今屆選舉投票破晒紀錄，忙於賣樓嘅發展商，都抽空投票，一盡公民責任。
家住港島東嘅長實郭子威話，前日大清早去鰂魚涌投票站，點知工作人員未準備好，惟有去食個中式粥粉麵早餐至去投票。佢對於投邊個一票三緘其口，但就話投下一票嘅參選人，最終入選咗喎。
最近忙於推售碧堤半島嘅九倉黃光耀，係九龍西選民，要等到夜晚做完晒售樓處嘅工作，先至去得投票，而且重帶埋囝囝一齊去，預早做公民教育。
買樓博升值，呢種傳統理念曾經打破，𠵱家又回歸，舊年沙士期間賣嘅樓花，𠵱家都帶挈買家賺錢，其中將軍澳蔚藍灣畔五座中層H室，更加前後幫咗兩個人賺錢落袋。
一手業主舊年買個價係二百二十九萬，今年三月以二百六十九萬賣出，先賺四十萬。個買家隨即放盤，近日再以二百八十二萬轉售，又賺十三萬，比舊年個價升咗兩成三。
物業管理𠵱家都要不斷提升水準，好似富城集團咁，會為啲豪宅提供酒店式管理服務，其中率先採用嘅何文田君頤峰，只得七百零個單位，但管理人手就有成七十幾人，一個人負責約十個單位。
富城企業事務董事趙伯琛話，就物業管理涉及嘅人手，做過調查統計，原來一般單一入口嘅多層住宅大廈，管理員同住宅嘅比例，係一比四十五，即一個人負責四十五伙，而公屋就係一比一百。
兩類物業嘅管理費有好大差別，真係一分錢一分貨。
美記鍾意聘請傳媒界或有關人士，公關部唔少員工曾任職記者，早前離職嘅顧問黃錦康，都做過報界。聽講，新請嘅顧問，亦同傳媒有淵源，呢位仁兄就係鄭概強。佢做過周刊廣告部，其後過檔英皇，負責傳媒。
聽聞佢已經返工一兩個月，正在了解美記各部門運作，遲啲可能轉趨高調。
另一邊廂，中記有人升職，天水圍嘉湖山莊分行郭佩玲，啱啱升任助理區域經理。佢九六年加入中記，舊年做高級分行經理，話咁快就升埋做區經，真係要請食飯。
蘭西
電郵地址：
