立法會選舉前晚告一段落，憑街頭抗爭起家、新界東候選人長毛梁國雄成功打入立法會，阿姐汪明荃、黃秋生和張堅庭等對長毛當選均表示歡迎。城中名髮型師及形象設計師均建議長毛開會時束起頭髮，建立整潔形象。
身為全國政協委員的阿姐汪明荃，昨日到西貢成豐片廠為鄔友正的海馬床褥及床上用品拍攝新一輯廣告時，表示前日投了新界東候選人田北俊一票。問到她對今次選舉結果是否滿意時，阿姐說：「唔係我滿唔滿意，最緊要係做唔做到嘢，田北俊都OK啦。」
對於長毛梁國雄當選新一屆立法會議員，阿姐認為是好事，她說：「有新面孔係好事，立法會需要有不同意見。」不過對於長毛表示有可能不宣誓效忠基本法一事，阿姐卻不大贊同說：「佢應該遵守立法會規矩，我唔知佢點選擇，但最緊要幫到市民。」
身為新界東選民的張堅庭前日投了長毛一票，昨日他寄語長毛要懂「知所進退」的政治藝術。張堅庭在電話中說：「我選長毛係因為佢嘅政綱，佢日日抬住副棺材，我都好想睇吓佢抬入立法會會係點？不過𠵱家佢入咗立法會就要學識乜嘢叫政治藝術，尤其係『知所進退』，佢要知道政治中間有妥協空間，唔好以為一直係咁衝就得。」
對於長毛當選立法會議員後每月薪金有五萬五千多元，身上忽然多了錢，張堅庭說：「佢由以前冇錢忽然多咗錢使，希望佢唔好淨係識用錢，都要識為民請命。」
杜汶澤則表示自己雖然未必同意長毛所講的說話，但對他當選一事感到開心，他說：「因為以後佢唔使坐喺立法會觀眾席鬧人，可以直情坐喺個會度鬧人，可以鬧幾耐都得，唔使俾人抬出去。香港需要有唔同嘅議員，我都好開心見到咁多人支持長毛。」
至於前日因病未能投票的黃秋生，對長毛當選亦大表支持，他說：「我支持長毛，我支持佢敢言敢為，香港需要呢啲議員。」
另一方面，不修邊幅及一把濃密長髮一直是長毛的個人特色，但不少人認為他當選立法會議員後，該在形象方面下點工夫，香港名髮型師RickyKwok建議說：「雖然長毛係代表人民，但去到議會場合，都應該有番個整齊形象，我唔建議佢將把長頭髮剪短，只要好似四哥謝賢咁，將頭髮全部梳向後束條辮，又或者中間分界，咁已經唔錯㗎啦。」
形象設計師張學潤（Nelson）則認為長毛不必刻意更改形象，他在電話中說：「佢好似平時着便服去立法會開會都冇問題，因為佢係代表基層巿民，不過最緊要保持乾淨同企理，政治唔一定要嚴肅，但要keep住鮮明形象，佢𠵱家一反傳統重突出。長毛可以繼續保留佢嘅長髮，有時重可以紮起㖭。」
採訪、攝影：馮美茵、張止寒、梁錦雯、比華利
