愛華頓中場卡希爾上星期六對曼城，因為嗰吓「拉雲拿利式」波衫笠頭慶祝入球方式，最終兩黃一紅出場餘波未了，國際足協會長白禮達都要出嚟解釋呢條不君子行為條例。
根據今年二月國際足協修訂條例，球例第十二條講球員如果除波衫，就要出示黃牌警告；但係將波衫揭起到胸部位置，就視乎各個聯賽規則尺度而定。
不過，白禮達就卡希爾事件出嚟講，話球證賓納特判決係錯嘅。我求大俠認為條例的確存灰色地帶，國際足協條例話明揭起波衫視乎各國聯賽尺度，所以白禮達唔可以話賓納特錯；而英超聯賽會亦應該出嚟解釋佢哋準則，係咪揭到「露點」就畀牌先？
不時有新球壇理論嘅雲格又有新質疑，話朗尼轉會去曼聯嘅附加條件，唔排除因為利益，紅魔同愛華頓會打假波；尤其係朗尼幫曼聯奪聯賽冠軍，愛華頓可獲一百萬鎊嘅條款。如果到奪標關鍵時刻，紅魔愛華頓對賽，真係好難講。我求大俠認為以阿仙奴戰績，使唔使咁驚呀！
諾域治日前作客和熱刺，門將格連有神勇演出，力挽狂瀾幫球隊保持不失，熱刺領隊辛天尼賽後重大讚佢有國際賽級嘅撲救。連同熱刺門將羅賓遜，英格蘭二、三號門將都保持不失球，絕對唔失禮。我求大俠覺得，英格蘭正選門將占士，真係好難再坐正首席門將位置囉！
今季被委任為羅馬副隊長嘅卡斯辛奴，前日對費倫天拿就衰衝動，用手打對方球員塊面被趕出場，佢「大佬」嘅托迪賽後就語重心長勸「細佬」改吓鋪牛脾氣。計我求大俠話要改嘅唔止卡斯辛奴，托迪喺比賽中又因插水攞黃牌。佢兩兄弟唔想做「大小不良」嘅話，齊齊都要改。
呢兩日嘅歐冠盃之中，德國球會拜仁慕尼黑星期三作客以色列特拉維夫馬卡比或者唔係大戰，都同樣矚目，因拜仁陣中有個伊朗前鋒夏舒文。由於夏舒文嘅國籍敏感，拜仁領導層畀佢唔隨隊，不過夏舒文就選擇隨隊；但伊朗體育部就話唔准夏舒文隨隊，真係唔知佢最終點決定。