港股在13000關口略作整固後，發力再上，升135點，高收13139，創出今個升浪收市新高，上升股（不計認股證）359隻，亦遠比下跌股171隻為多。期指尾段明顯轉強，由原本低水40點升番上接近平水，而國指亦起番30點，重上正方，大市在高位承接力頗強，恒指短期可向13400水平推進。
上月底推介銀建國際（171），當時股價2.05元，噚日去到2.45元，升幅20%，從股價表現看，本周五派中期成績表，相信唔會令投資者失望。銀建歷時半年的大型收集已完成，上周衝破大圓底頸線2.15元阻力，上望目標係3.05元。
美聯物業（1200）調整完又再升過，一浪高過一浪，收2.725元，升5.8%，上月25日推介時，股價2.275元，升幅亦近20%，由於大型收集已完成，短期仍可以3元為獲利目標。
遠東發展（035）在1.8元至1.9元間，牛皮整固大半個月，噚日走勢再度呈強，且成交1843萬股（比上周五大增2倍），顯示調整快完成，若衝破1.9元阻力，短期上升目標指向2.45元。
從周線圖看，由3月開始，遠展形成一個大型頭肩底，上月底破位而上，照度上去，目標亦係2.45元。現水平入市，保守估計短線可獲利近30%，中線更應不止此數。
無論以盈利表現同資產淨值嚟計，遠展呢兩瓣都好煞食。盈利表現大家都心中有數，但不妨講多次，起碼對佢嘅升勢更有信心。
遠展上年度（04年3月年結），轉盈賺1.49億元，往績PE13倍，現年度盈利肯定以倍計增長，單係售樓同酒店，起碼賺3.5億元，加上出售旺角物業獲利2.8億元，合共6.3億元，每股盈利0.53元，預測PE只係3.5倍！
上海錦秋加州花園重有5300個單位待發展，以每年賣1000個計，即係未來5年，每年都可以提供3至4億元盈利（重未計樓價上升嘅因素），再加上酒店同租金收入，就算股價升上3元水平，PE都只係6倍。
04年3月底，遠展每股資產淨值2.33元，但計入發展物業、投資物業同酒店增值之數，每股資產值可達4元，現股價大幅折讓逾50%！
郭兆誠